नेपाली बजारमा भविष्य खोजिरहेका फरक मूल्य र फिचर सहित १५ सय सीसी क्षमताका २ चिनियाँ एसयूभी

नेपालीे बजारमा पछिल्लो समय चिनियाँ ब्रान्डका प्यासेन्जर कार भित्रिने क्रम बढ्दै गएको छ । झन्डै ३ बर्षअघि चीनको प्रख्यात अटोमोबाइल ब्रान्ड डीएफएसकेको प्रवेशसँगै नेपालमा चिनियाँ ब्रान्डले पुनः प्रभाव जमाउन थालेका हुन् । यो अवधिमा डीएफएसकेले उल्लेख्य कारोबार गरेपछि अन्य ब्यावसायीक घरनाको समेत यस्ता ब्रान्डमा नजर परेको सहजै अनुमान लगाउन सकिन्छ ।

डीएफएसके भित्रिनुअघि एमएडब्लु ग्रुपले चीनको अर्को प्रख्यात ब्रान्ड फोटोनलाई आयात गरी कारोबार थालिसकेको थियो । कम्पनीले फोटोनका पिकअप र मिनीबस आयात गरी कारोबार गर्दै आइरहेको छ । यो सेग्मेन्टमा समेत फोटोनले राम्रै प्रभाव पार्न सफल भैरहेको छ । आकर्षक लुक्स, सुविधासम्पन्न फिचर्स र उच्चतम पर्फमेन्सका बाबजुद सस्तो मूल्यमा उपलब्ध हुनु चिनियाँ ब्रान्डको विशेषता हो । यही विशेषताका कारण डीएफएसके र फोटोनले बजारमा राम्रो प्रभाव जमाउन थालेपछि अन्य व्यावसायिक घरानाहरुले समेत चिनियाँ ब्रान्डका सवारीसाधन आयात गर्न थालिसकेका छन् ।

नेपालको सबैभन्दा ठूलो व्यावसायिक घराना विशाल ग्रुपले हालसालै ग्रेटवाल मोटर्स भित्र्याएपछि चिनियाँ ब्रान्ड झनै चर्चित बनेको छ र यसअघि राम्रो कारोबार गर्दै आइरहेको डीएफएसकेका लागि नयाँ चुनौती समेत थप भएको छ ।

चिनियाँ ब्रान्डमा यसअघि एकछत्र बजार लिइरहेको डीएफएसकेलाई टक्कर दिन ग्रेटवालको ह्यावल एसयूभी कत्तिको सफल रहला यसका लागि भने केही समय कुर्नुपर्ने देखिन्छ ।

नेपाली बजारमा कारोबार हुने डीएफएसके र ह्यावल दुबै १५ सय सीसी क्षमताका एसयूभी हुन् । यो सेग्मेन्टमा डीएफएसकेका ग्लोरी ५८० आईअटो, ग्लोरी ५८० सीभीटी कम्फर्ट, ग्लोरी ५६० एमटी बेसिक र ग्लोरी ५६० सीभीटी लक्जरी गरी ४ भेरिएन्ट उपलब्ध छ । यी एसयूभीको मूल्य क्रमशः ८९ लाख ५० हजार, ६८ लाख ५० हजार, ५८ लाख ५० हजार र ६४ लाख ५० हजार कायम गरिएको छ । चिनियाँ ब्रान्ड भएपनि यी एसयूभी इन्डोनेशियाबाट आयात भैरहेका छन् ।

ग्रेटावाल ह्यावलका ३ वटा एसयूभी यो सेग्मेन्टमा उपलब्ध रहँदै आएको छ । जसमध्ये जोलियन लो एमटीको मूल्य ५५ लाख ५० हजार, जोलियन हाई एमटीको ६१ लाख ५० हजार र जोलियन हाई डीसीटी भेरिएन्टको मूल्य ६५ लाख ५० हजार तोकिएको छ । यी एसयूभी चीनबाटै आयात हुन्छन् ।

समान सीसी क्षमताको भैकन पनि ग्रेटवालको तुलनामा डीएफएसके धेरै मूल्य अन्तरले महंगो देखिन्छ । डीएफएसकेको बेस भेरिएन्ट ग्लोरी ५६० एमटी बेसिकको तुलनामा ग्रेटवालको सोही भेरिएन्ट जोलियन लो एमटी ३ लाख रुपैयाँले सस्तो देखिएको हो । त्यसैगरी डीएफएसकेको टप भेरिएन्ट अर्थात ग्लोरी ५८० आई–अटो समेत ग्रेटवालको सोही भेरिएन्ट अर्थात जोलियन हाई डीसीटीको तुलनामा २४ लाख रुपैयाँले महंगो देखिन्छ । यद्यपि यी दुई गाडीको फिचर्समा भने केही अन्तर रहेको छ ।