ईएफआई सिस्टममा आउने भयो क्रसएक्स २५०आर, मूल्य पहिले भन्दा ७० हजार बढी

काठमाडौं – नेपाली बजारमा ईएफआई प्रविधियुक्त क्रसएक्स २५०आर मोटरसाइकल उपलब्ध हुने भएको छ । हाल सम्म कार्बुरेटरयुक्त मोटरसाइकल उपलब्ध भएकोमा अब नयाँ प्रविधियुक्त मोटरसाइकल भित्रिन लागेको हो ।

नेपालका लागि क्रसएक्सको आधिकारिक वितरक बाइकर्स नेपालले सो मोटरसाइकलको बुकिङ समेत खुला गरेको छ । आगामी एक महिना भित्रै यो मोटरसाइकल बिक्रीका लागि उपलब्ध हुने बताइएको छ ।

नयाँ ईएफआई प्रविधियुक्त क्रसएक्स २५०आर मोटरसाइकलको मूल्य ७ लाख ६५ हजार रुपैयाँ तोकिएको छ । पहिले यसको मूल्य ६ लाख ९५ हजार रुपैयाँ थियो । पहिले भन्दा नयाँ २०२२ मोडलको मूल्य ७० हजार रुपैयाँ बढी हुनेछ ।

यो मोटरसाइकलमा २४९.६ सीसीको सिंगल सिलिन्डर, फोर स्ट्रोक इन्जिन छ, जसले ३२ एचपीको पावर दिन्छ । ६–स्पिड गियरबक्स भएको सो मोटरसाइकलको फ्रन्ट र रियरमा निसिन सिंगल डिस्क ब्रेक छ ।

३६१ एमएम ग्राउन्ड क्लियरेन्स भएको यो मोटरसाइकलको सिटको उचाई ९४० एमएम छ भने ६.५ लिटरको इन्धन ट्यांकी छ । यो मोटरसाइकल रेड र ब्ल्याक गरी दुई कलर अप्सनमा उपलब्ध हुनेछ ।