कम्प्याक्ट एसयूभीमा हुन्डाई क्रेटाको क्रेज कायमै, गत महिना विक्यो १५ हजार ७८६ यूनिट

काठमाडौं– हुन्डाई मोटर्सको सर्बाधिक सफल एसयूभी क्रेटा विगत लामो समयदेखी सर्बाधिक बिक्री हुने मोडलमा गनिँदै आएको छ । कम्प्याक्ट एसयूभी सेग्मेन्टमा पर्ने क्रेटा भारतमा मात्रै नभई नेपाली एसयूभी पारखीको समेत पहिलो रोजाई हो ।

नेपालमा बिद्युतीय एसयूभीको क्रेज बढ्नुअघि यस सेग्मेन्टमा सर्बाधिक बिक्री हुँदै आएको क्रेटाको क्रेज भारतिय बजारमा भने हालसम्म पनि कायमै छ । क्रेटाले भारतमा हरेक महिनाजसो बिक्री चार्टमा पहिलो स्थान हाँसिल गर्दै आएको छ । सोहि क्रममा गत जुनमा पनि यस एसयूभीले प्रतिस्पर्धीलाई निकै पछि पारी आफ्नो स्थान सुरक्षित गरेको छ ।

गत महिना भारतमा १५ हजार ७८६ यूनिट क्रेटा बिक्री हुँदा दोस्रो स्थानमा रहेको टोयोटा हाइराइडर जम्मा ७ हजार ४६२ यूनिट बिक्री भएको थियो । त्यसैगरी, तेस्रो स्थानमा रहेको सुजुकी ग्रान्ड भिटरा ६ हजार ८२८ यूनिट बिक्री भयो । उक्त महिना कुल ४२ हजार कम्प्याक्ट एसयूभी बिक्री भएकोमा हुन्डाई क्रेटाले मात्रै ३५ प्रतिशत हाराहारी बजार हिस्सा ओगटेको छ ।

ईभी भर्सनमा समेत आएपछि क्रेटाको बिक्री हरेक महिना उकालो लागिरहेको छ । मे महिनामा कुल १४ हजार ८६० यूनिट क्रेटा बिक्री भएकोमा जुनमा ६.२३ प्रतिशतले बढेर १५ हजार ७६८ यूनिट पुगेको हो । जवकी दोस्रो स्थानमा रहेको टोयोट हाइराइडको बजार भने घट्दो क्रममा छ ।

गत जुनमा, कियाले ५ हजार २२५ यूनिट सेल्टोस, टाटाले २ हजार ६० यूनिट कर्भ, होन्डाले १ हजार ६३५ यूनिट एलिभेट, महिन्द्राले १ हजार २०३ यूनिट बीई६, फक्सवागनले १ हजार १६८ यूनिट टाइगुन, स्कोडाले ७९२ यूनिट कुशाक र एमजीले ३१७ यूनिट एमजी जेडएस ईभी बिक्री गरेको छ । जुनमा सिट्रोन सी३ एयरक्रस भने जम्मा ४९ यूनिटमात्र बिक्री भएको तथ्यांकमा उल्लेख गरिएको छ ।

नेपालमा पनि उस्तै क्रेज
क्रेटा नेपाली बजारमा समेत निकै रुचाइएको एसयूभी हो । नेपाली बजारमा यो एसयूभी पेट्रोल इन्जिन र इलेक्ट्रिक दुवै पावरट्रेनमा उपलब्ध छ । विगत केहि समययता नेपालमै एसेम्वल हुन थालेपछि यसको मूल्य एउटै मोडलमा ९ लाख रुपैयाँसम्मले सस्तो भएको छ । जसका कारण पनि यस एसयूभीम रुची राख्ने ग्राहक बढिरहेका छन् ।

अर्कोतफ, ईलेक्ट्रिक भर्सनमा समेत उपलब्ध हुन थालेपछि ग्राहकले छनोटमा विकल्प पाएका छन् भने क्रेटा ईभी समेत अहिले निकै राम्रो संख्यामा बिक्री भइरहेको छ ।