हुन्डाई क्रेटा र भेन्यू फेसलिफ्टको डिजाइन टुसानको जस्तै हुने

हुन्डाई मोटर्स इन्डियाले यसै बर्षको अन्त्यसम्ममा लन्च गर्ने भनिएको क्रेटा २०२२ मोडल र भेन्यू फेसलिफ्टको डिजाइन टुसान एसयुभीको जस्तै हुने आँकलन गरिएको छ । यी दुई नयाँ एसयुभीको डिजाइनलाई अन्तिम स्वरुप दिने तयारी भैरहेको सन्दर्भमा यसको सम्भाबित लुक्स तथा डिजाइनका बारेमा यस्तो आँकलन गरिएको हो । हुन्डाइले भारतीय बजारमै टुसानको उत्पादन गर्ने तयारी गरिरहेको सन्दर्भमा समेत यी दुई नयाँ मोडलमा सोही एसयुभी प्रेरित डिजाइन दिन सक्ने अनुमान गरिएको छ ।

इन्डोनेशियामा अघिल्लो बर्ष लन्च गरिएको क्रेटाको नयाँ मोडलमा दिइएको इन्टेरियरलाई नै निरन्तरता दिइने जनाएको हुन्डाई मोटर्स इन्डियाले यसको फ्रन्टमा भने ब्यापक परिबर्तन गरिने यसअघि नै बताएको थियोे । यो नयाँ मोडलमा टुसानको जस्तै प्यारामेट्रिक ज्वेल प्याट्रन फ्रन्ट ग्रिल रहने र युनिक हेडल्याम्प क्लस्टर र नयाँ एलइडी डिआरएललाई समायोजन गर्न सकिने जनाइएको छ । साथै नयाँ हाउजिंग र फराकिलो सेन्ट्रल एयर इन्टेक सहित यसको फ्रन्ट वम्परलाई समेत रिडिजाइन गरिने भएको छ ।

त्यसैगरी भेन्यू फेसलिफ्टमा पनि परमार्जन गरिएको ग्रिल, अपडेट गरिएको स्प्लिट हेडल्याम्प क्लस्टर, नयाँ फगल्याम्प, रिडिजाइन गरिएको फ्रन्ट र रियर वम्पर र नयाँ ह्विल सहित अन्य थुप्रै पक्षमा परिमार्जन गर्न लागिएको छ । जसले यो सब फोर मिटर एसयुभीलाई पनि टुसानको जस्तै लुक्स दिने अनुमान लगाइएको छ ।

यी दुबै एसयुभीको पावर ट्रेनमा भने कुनै पनि परिबर्तन नगरिने भएको छ । सेफ्टि फिचर्सको कुरा गर्नुपर्दा भने नयाँ क्रेटामा एड्भान्स ड्राइभर एसिस्टेन्स सिस्टममा आधारित फिचर्सहरु जस्तो अटोनोमस इमर्जेन्सि ब्रेकिङ, व्लाइन्ड स्पट मोनिटरिङ, लेन किप एसिस्ट, फरवार्ड कोलिजन अभ्वाइडेन्स, र एडप्टिभ क्रुज कन्ट्रोल लगायत थप हुन सक्ने जनाइएको छ ।