ग्राण्ड भिटरामा देखियो अत्याधिक क्रेज, २ महिनामा ५३ हजार वुक, गाडी हात पार्न ५ महिना कुर्नुपर्ने

मारुती सुजुकीले २ महिनाअघि सार्वजनिक गरेको ग्राण्ड भिटरामा भारतीय ग्राहकले अत्याधिक रुची देखाएका छन् । यसै महिनाको अन्तिममा मूल्य सहित औपचारिक लन्च हुने प्रतिक्षामा रहेको यो कम्प्याक्ट एसयूभी हालसम्म ५३ हजार युनिट वुक भैसकेको जनाइएको छ । हालको वुकिङलाई आधार मान्दा यसको केही भेरियन्टलाई हात पार्न ग्राहकले ५ महिनासम्म पर्खनुपर्ने देखिन्छ ।

कम्पनीका अनुसार यसको हाइव्रिड भर्सनलाई ग्राहकले अत्याधिक रुचाएका छन् । कुल वुक भएको गाडीको ४३ प्रतिशत अर्थात २३ हजार युनिट हाइव्रिड भर्सनको रहेको वताइएको छ । भिटरासहित व्रेजा, वलेनो र नयाँ अल्टोसहित भारतमा सुजुकी गाडी हात पार्न ४ लाख ग्राहक प्रतिक्षारत छन् ।

भारतीय बजारमा लन्च भएपछि नेपाल समेत आउने यो एसयुभीले कम्प्याक्ट एसयूभी सेग्मेन्टमा हाल कारोवार भैरहेका हुन्डाई क्रेटा, किया सेल्टोस, फक्सवागन टाइगुन र स्कोडा कुसाक लगायतसंग प्रतिस्पर्धा गर्नेछ ।

यस्तो छ यो नयाँ एसयूभी
यो नयाँ एसयूभीमा १.५ लिटर के १५ सी इन्जिन जडान गरिएको हो । जसले १०३ एचपी पावर र १३६ एनएम टर्क जेनेरेट गर्दछ । ५ स्पीड म्यानुअल र ६ स्पीडको टर्क कन्भर्टर गियरबक्स दिएको ग्रान्ड भिटरामा इन्जिनसँग सिन्क्रोनास एसी मोटर जडान गरिएको छ । यो हाइब्रिड इन्जिनको संयुक्त पावर ११४ बीएचपी र टर्क १४१ एनएम रहेको छ । हाइव्रिड इन्जिका कारण यसको माइलेज समेत उच्च छ । ग्रान्ड भिटराले २८ किलोमिटर माइलेज दिने दावी गरिएको छ ।

यो एसयूभीमा ४० भन्दा बढी कनेक्ट फिचर सहितको ९ इन्चको टचस्कृन इन्फोटेन्मेन्ट सिस्टम र फुल्ली डिजिटल इन्स्ट्रयुमेन्टर क्लस्टर पाउन सकिन्छ । टप भेरियन्टमा अगाडि दुबै सिटमा भेन्टीलेटेड सिट छ भने ३६० डिग्री सराउण्ड भ्यू क्यामेरा, वायरलेस चार्जर, डिभाइस लेफ्ट अलर्ट सिस्टम पनि पाउन सकिन्छ । भिटरामा पनारोमिक सनरुफ समेत दिइएको छ ।

६ वटा एयरव्याग दिइएको यो एसयूभीमा इलेक्ट्रोनीक स्टेविलीटी कन्ट्रोल, टायर प्रेसर मोनिटरीङ सिस्टम र चारवटै चक्कामा डिसब्रेक दिइएको छ । साथै, चालकको सहजताका लागि हिलहोल्ड असिस्ट, हिल डिसेन्ट कन्ट्रोल र टीपीएमएस जस्ता सुविधा उपलब्ध छ । यसको मूल्य ११ देखी १८ लाख भारुसम्म कायम हुनसक्ने अनुमान लगाइएको छ ।