चार्जिङ स्टेसन बनाउन, सवारी साधन खरिद गर्न र मर्मत सम्भार गर्न सहुलियत ऋण पाइने

काठमाडौं – सरकारले आज प्रस्तुत गरेको चालू आर्थिक वर्ष २०७८/७९ को मौद्रिक नीतिमार्फत अटोमोबाइल क्षेत्रका लागि समेत विभिन्न व्यवस्थाहरु गर्ने भएको छ ।

विद्युतीय सवारी साधनको चार्जिङ स्टेसन बनाउन सहुलियतपूर्ण कर्जा पाइने भएको छ ।
नेपाल राष्ट्र बैंकले मौद्रिक नीतिमार्फत विद्युतीय सवारीका लागि चार्जिङ स्टेशन बनाउन सहुलियतपूर्ण कर्जा दिने व्यवस्था गरेको हो ।

सरकारले बजेट मार्फत विद्युतीय सवारीसाधनलाई प्रोत्साहन गर्ने नीति लिएको छ । सोही नीति कार्यान्वयन गर्न राष्ट्र बैंकले सहुलियतपूर्ण कर्जाको व्यवस्था गरेको हो ।

सहुलियत पूर्ण कर्जा लिँदा सरकारले ५ प्रतिशतसम्म ब्याज अनुदान दिने व्यवस्था छ । यो सँगै संस्थाहरूलाई पुनर्कर्जाको सदुपयोग गरि देशका विभिन्न स्थानमा विद्युतीय सवारीका लागि आवश्यक पर्ने चार्जिङ स्टेसन निर्माण गर्ने मद्दत पुग्ने उल्लेख गरिएको छ ।

त्यसैगरी सवारीसाधन खरिदगरी स्वरोजगार हुन चाहनेलाई प्रोत्साहन गरिने भएको छ ।

ऋणी स्वयं स्वरोजगार हुनेगरी सवारीसधान खरिद गर्न प्रवाह हुने २५ लाख रुपैयाँसम्मको कर्जालाई विपन्न वर्ग कर्जामा गणना गर्न सकिने व्यवस्था गरिएको छ । बैंकहरुले ५ प्रतिशत व्याजदरमा विपन्न वर्ग कर्जा प्रवाह गर्दै आइरहेका छन् ।

त्यसैगरी कोरोनाले समस्यामा पारेको सार्वजनिक यातायातको मर्मतसम्भारका लागि थप दुई लाख रुपैयाँ सम्मको ऋण दिने व्यवस्था गरिएको छ ।