गाडी र मोटरसाइकलको डिलरसिप खोस्न होडबाजी, ११ बर्षमा खोसिए ११ ब्रान्डको डिलरसिप

गाडी र मोटरसाइकलको कारोबारमा नयाँ ठूला व्यवसायीक घरनाको रुची बढ्न थालेपछि पछिल्लो सयम यो क्षेत्रमा डिलसिप खोस्न होडबाजी नै चलेको छ । सन् २०११ मा शंकर ग्रुप अन्तर्गतको एसजी ग्लोबलले महिन्द्रा टु ह्विलरको डिलरसिप श्रेष्ठ इन्टरनेश्नलबाट खोसेपछि सुरु भएको यो होडबाजीको पछिल्लो शिकार रोयल इन्फिल्ड बनेको छ । ११ बर्षको यो अबिधीमा ११ वटै ठूला ब्रान्डको डिलर परिवर्तन भएका छन् ।

निर्माण सामाग्रीको उत्पादनमा केन्द्रित रहँदै आएको शंकर ग्रुपले महिन्द्रा टु ह्विलरको डिलर लिएसंगै अटोमोवाइल व्यवसायमा उसको इन्ट्रि भएको थियो । हाल यो समुहसंग टिभिएस सहित केस तथा जुमोलाइन हेभी इक्विपमेन्ट, प्रोटोन, जेएमसी, र मर्सिडिज बेन्ज समेत गरी कुल ६ वटा ब्रान्डको डिलरसिप रहेको छ । जसमध्ये केस ब्रान्डको इक्विपमेन्टलाई समेत उसले त्यसअघिको बिक्रेता फोर्स कन्स्ट्रक्सनलाई हटाएर आफू मातहत लिएको हो ।

सन् २०१३ मा विशाल ग्रुपले गणेश इन्टरप्राइजेजबाट सुजुकीको डिलर खोसेको २ वर्षपछि अर्थात सन् २०१५ मा शंकर ग्रुपले चौधरी ग्रुपबाट टिभिएसको डिलरसिप खोसेको थियो । लामो समयदेखी बिक्री गर्दै आइरहेको चौधरी ग्रुप अन्तर्गतको एआईटी प्रालिबाट शंकर ग्रुपले यो ब्रान्डको डिलरसिप खोसेपछि अहिले पनि यी दुई घरनाबिच एक प्रकारको कर्पोरेट वार नै चलिरहेको छ ।

डिलसिप खोसिने यो क्रमले निरन्तरता पाउँदै जाने क्रममा सन् २०१७ मा शारडा ग्रुप अन्तर्गतको पायोनियर मोटोकर्पले दुगड ग्रुपबाट निशानको डिलसिप खोस्न पुग्यो । ३० वर्षसम्म निशान गाडीको कारोबार गरिरहेको दुगडले यो ब्रान्डको डिलरसिप गुमाउनु परेको पिडाको बदलामा डि लाइफ स्टायलबाट भेस्पा र अप्रिलया स्कुटरको डिलरसिप खोसेको थियो । दुगडले पहिलेदेखी नै पियाजिओ ब्रान्डको थ्रि ह्विलर आयत गरी कारोबार गरिरहेका कारण उसलाई सोही ग्रुप अन्तर्गतको भेस्पा र अप्रिलिया ब्रान्डलाई आफू मातहत ल्याउन खासै कसरत गर्नु परेन ।

यसैगरी सन् २०१८ मा बिशाल ग्रुप समेत संलग्न रहेको पारापाउन्ट मोटर्सले एसएलआर टेक्नो एन्ड ट्रेडबाट एमजी ब्रान्डको डिलरसिप खोस्यो । गाडीको कारोबारमा खासै अनुभव नभएको एसएलआरले डिलरसिप खोसिने पक्कापक्कि भएपछि समझदारी गरेर आफ्नो सबै स्टक पारामाउन्ट मोटर्सलाई बिक्री गरेको थियो ।

एमजीको डिलरसिप लिएको २ बर्ष पछि अर्थात सन् २०२० मा यो कम्पनीले अर्को जापनिज ब्रान्ड माज्दाको डिलरसिप पद्यमश्री ग्रुपबाट खोसेर आफू मातहत ल्यायो । सोही बर्ष सिप्रद्धीले कारोबार गर्दै आइरहेको टाटा हिटाचीको डिलरसिप दुगड समुहले आफू मातहत ल्याउँदा त्यसको ठिक २ बर्षपछि उसले रोयल इन्फिल्डको डिलरसिप गुमाउनु परेको छ । यससंगै रोयल इन्फिल्डको नयाँ बिक्रेताका रुपमा अटोमोबाइल व्यवसायमा यसअघि कुनैपनि अनुभव नभएको अर्को ठूला व्यापारिक घरना त्रिबेणी ग्रुप नियुक्त भएको छ ।