कम्प्याक्ट एसयूभीमा प्रतिस्पर्धा गर्न नेपाल आउँदै नयाँ क्रेटा र ग्रान्ड भिटारा, यस्तो छ भिन्नता

प्यासेन्जर कार सेग्मेन्टमा कडा प्रतिस्पर्धा गरिरहेका सुजुकी र हुन्डाईबीच निकट भविष्यमा कम्प्याक्ट एसयूभी सेग्मेन्टमा पनि कडा प्रतिस्पर्धा हुने देखिएको छ । हुन्डाईले यो सेग्मेन्टमा क्रेटालाई उतारेर आफ्नो दवदवा कायमै गरिरहेको अवस्थामा सुजुकीले पहिलोपटक ग्रान्ड भिटारालाई उतार्न लागेको हो ।

कोभिड महामारीका कारण चिप अभावको समस्या झेल्दै आएको कोरियन अटो निर्माता कम्पनी हुन्डाईले माग वमोजिम क्रेटालाई नेपाल पठाउन सकिरहेको थिएन । यस्तोमा नेपालस्थित आधिकारिक विक्रेता लक्ष्मी इन्टरकन्टिनेन्टल प्रालिले २०२३ मोडलको नयाँ क्रेटा नेपाल ल्याउन तयारी थालिसकेको छ । नयाँ क्रेटा पेट्रोल इन्जिनमा ६ वटा भेरिएन्ट सहित नेपाल आउने तयारीमा रहेको वताउँदै कम्पनीले मूल्य समेत सार्वजनिक गरिसकेको छ । नयाँ क्रेटाको मूल्य ५२ लाख ५६ हजारदेखि ७८ लाख ९६ हजार रुपैयाँसम्म तोकिएको हो ।

उता आयात प्रतिवन्धका कारण नेपाल आउन रोकिएको ग्रान्ड भिटारालाई छिट्टै लन्च गर्नेगरी आधिकारिक विक्रेता सिजी मोटोकर्पले यो नयाँ एसयूभीको बुकिङ खुल्ला गरेको छ । ५० हजार रुपैयाँ लिएर बुकिङ लिन थालिएको यो एसयूभी माइल्ड हाइब्रिड इन्जिनसहित नेपाल आउन लागेको हो । जसमध्ये भिटाराको अल्फा भेरिएन्ट अहिले शोरुममा उपलब्ध छ । कम्पनीले यसको मूल्य सार्वजनिक गरिनसके पनि अनुमानित ८० लाख हाराहारी पर्ने जनाइएको छ ।

इन्जिन र पावरमा भिन्नता
पेट्रोल, डिजेल र टर्वो पेट्रोल गरी कुल तीन इन्जिन अप्सनमा उत्पादन हुँदै आएपनि नयाँ क्रेटा पेट्रोल इन्जिनमा मात्र नेपाल आउनेछ । यसैगरी माइल्ड र स्ट्रङ हाइव्रिड इन्जिनमा उत्पादन हुँदै आएको ग्रान्ड भिटाराको पनि तत्काल माइल्ड हाइब्रिड इन्जिन मात्र उपलब्ध हुने कम्पनी स्रोतको भनाइ छ ।

१.५ लिटर नेचुरल्ली एस्पिरेटेड पेट्रोल इन्जिनका साथ नेपाल आउन लागेको नयाँ क्रेटाको पावर ११५ पीएस र टर्क १४४ एनएम रहेको छ । यसैगरी १.५ लिटरमै माइल्ड हाइब्रिड इन्जिनका साथ आउने तयारीमा रहेको ग्रान्ड भिटाराको पावर १०३ पीएस र टर्क १३६.८ एनएम रहेको छ ।

सुजुकीले यो एसयूभीमा इन्जिनका साथै ड्युअल ब्याट्री सेटअप पनि दिएको छ । सो ब्याट्रीले शुरुमा इन्जिन चल्दा वा एक्सिलरेसन बढाउने बेलामा पिकअप लिन सहयोग गर्छ । यसका कारण गाडीको माइलेज बढाउन र प्रदूषण कम गर्न सहयोग गर्छ । ब्याट्री सेटअप भए पनि यसलाई छुट्टै ब्याट्रीबाट मात्रै भने चलाउन सकिदैन ।

फिचरमा भिन्नता
क्रेटामा १०.२५ इन्चको टचस्क्रिन इन्फोटेनमेन्ट सिस्टम, बोसको ८ वटा प्रिमियम स्पिकर, हुन्डाईको व्लु लिंक कनेक्टिभिटी दिइएको छ । साथै यसमा पानारोमिक सनरुफ, भ्यान्टिलेटेड फ्रन्ट सिट, इलेक्ट्रिकल्ली एड्जस्टेवल ड्राइभर सिट, ७ इन्चको टिएफटी कलर इन्स्ट्रयुमेन्ट क्लस्टर, स्मार्ट प्युरिफायर, तीन फरक ड्राइभिङ मोड, रिमोट इन्जिन स्टार्ट, ६ वटा एयरव्याग, इलेक्ट्रोनिक्स स्टेविलिटी कन्ट्रोल, हिल स्टार्ट एसिस्ट कन्ट्रोल, भेइकल स्टेविलिटी म्यानेजमेन्ट सिस्टम, हाइट अनुसार मिलाउन मिल्ने सिट बेल्ट जस्ता फिचर पाउन सकिन्छ ।

ग्रान्ड भिटारामा एप्पल कारप्ले, एन्ड्रोइड अटो कनेक्टिभिटी सहितको ९ इन्चको टचस्क्रिन इन्फोटेनमेन्ट सिस्टम, ठूलो एमआईडी भएको सेमी–डिजिटल इन्स्ट्रयुमेन्ट क्लस्टर, लेयर्ड ड्यासबोर्ड, सेन्टर कन्सोल, ६ वटा एयरब्याग, ३६० डिग्री क्यामेरा सिस्टम, हेड–अप डिस्प्ले, अटोमेटिक क्लाइमेट कन्ट्रोल, क्रुज कन्ट्रोल, इलेक्ट्रिक सनरुफ, इन्जिन स्टार्ट र स्टप बटन, वायरलेस चार्जिङ डक, रियर एसी भेन्ट्स जस्ता फिचर दिइएको छ ।