सिट्रोनले भोली नयाँ एसयुभी कुपेको ग्लोबल डेब्यू गर्दै, टाटा कर्भसंग प्रतिस्पर्धा हुने

फ्रेन्च अटो निर्माता सिट्रोनले भोली नयाँ एसयूभी कुपेको ग्लोबल डेब्यू गर्ने भएको छ । भारतीय बजारलाई लक्षित गरी आउन लागेको सो नयाँ एसयूभीलाई कम्पनीले ‘बासल्ट भिजन’का रुपमा यसको प्रि प्रोडक्सन कन्सेप्ट देखाउन लागेको हो । नयाँ एसयूभी यसै बर्षको मध्यतिर लन्च हुनसक्ने अनुमान गरिएको छ ।

कम्पनीले यसको एक टिजर समेत सार्बजनिक गरेको छ । उक्त टिजरमा स्लोपिङ रुफलाइन र स्क्वायर एलइडी टेल ल्याम्प देख्न सकिन्छ । यसअघि सार्बजनिक भएको स्पाई तस्विरमा कारको ड्यासबोर्ड सि३ र सी३ एयरक्रसको जस्तै देखिएको थियो ।

सो नयाँ एसयूभीमा अटोमेटिक क्लाइमेट कन्ट्रोल, पुस बटन स्टार्ट, ६ वटा एयरब्याग, १०.२ इन्चको टचस्क्रिन इन्फोटेन्मेन्ट सिस्टम, वायरलेस एप्पल कार प्ले एबं एन्ड्रोइड अटो, पूर्णत डिजिटल ड्राइभर डिस्प्ले, स्टेरिङ माउन्टेड अडियो कन्ट्रोल र किलेस इन्ट्रि लगायत फिचर उपलब्ध हुने अनुमान गरिएको छ ।

एसयुभीमा ११० पीएस पावर भएको १.२ लिटर टर्बो पेट्रोल इन्जिन जडान हुनसक्ने आँकलन गरिएको छ । ६ स्पिड म्यानुअल र ६ स्पिडकै टर्क कन्भर्टर अटोमेटिक ट्रान्समिसन उपलब्ध हुने कारको मूल्य ८ लाख भारु हाराहारी तय हुने अनुमान छ । सो नयाँ एसयूभीले टाटा कर्भसंग प्रतिस्पर्धा गर्ने देखिन्छ ।