सेफ्टि टेष्टमा कमजोर देखियो सिट्रोन ईसी–३, पायो जिरो स्टार रेटिङ

सिट्रोनले भारतमा उत्पादन गरेको इलेक्ट्रिक कार ईसी–३ सेफ्टि टेष्टमा निकै कमजोर देखिएको छ । ग्लोबल एनक्यापले गरेको क्र्यास टेष्टमा सो ईभीले जिरो स्टार रेटिङ पाएको हो । यद्यपी यसले बाल सुरक्षाको लागि भने १ स्टार रेटिङ पाएको छ ।

कारले वयस्क यात्रु सुरक्षाका लागि २०.८६ अंक र बालबालिकाको सुरक्षाका लागि १०.५५ अंक प्राप्त गरेको छ । अगाडिको प्रभाव परीक्षणमा कारले चालक र यात्रुको टाउको र घाँटीमा राम्रो सुरक्षा प्रदान गरेको जनाएको छ । साइड इम्पेक्ट टेस्टमा कारले टाउकोमा मार्जिनल सुरक्षा र छातीमा पर्याप्त सुरक्षा प्रदान गरेको उल्लेख छ । साइड पोल प्रभावको भने परीक्षण गरिएको थिएन।

पछिल्लो क्र्यास टेष्टको नतिजाको प्रतिक्रियामा स्टेलान्टिसले एक विज्ञप्ति जारी गर्दै आफ्ना सवारी साधनहरूले हालको स्थानीय बजार नियमहरूको पालना गर्ने र १ बर्षभित्र ६ वटा एयरब्यागहरू र अतिरिक्त सुरक्षा सुविधाहरूको साथमा सुरक्षाको लागि आफ्नो प्रतिबद्धता पुरा गर्ने बताएको छ ।

ईसी–३ नेपाली बजारमा समेत उपलब्ध रहँदै आएको इलेक्«िट्रक क्रसओभर हो । कारमा २९.२ किलोवाट आवरको ब्याट्री प्याक र ४१ किलोवाट क्षमताको मोटर जडान गरिएको छ । दुई भेरिएन्टमा उपलब्ध यसको मूल्य ३३ र ३५ लाख तोकिएको छ । यो कारले सिंगल चार्जमा ३२० किलोमिटर रेन्ज दिने दावी गरिएको छ ।