इभी वजारमा नयाँ खेलाडीको उदय, सिट्रोन ई–सी३ को कस्तो रहला बजार

नेपाली इभी बजारमा अर्को नयाँ इलेक्ट्रिक कार सिट्रोन ई–सी३ को उदय भएको छ । फ्रेन्च अटो ब्रान्ड सिट्रोनले भारतमा उत्पादन गरेको सो कारको आधिकारिक विक्रेता सांग्रिला मोटर्सले एक महिना अघि वुकिङ खुलाएको थियो । वुकिङ खुलेको छोटो समयमै १०० भन्दा वढी ई–सी३ बिक्री भएको कम्पनीले जनाएको छ ।

अवको केही सातापछि ग्राहकलाई डेलिभरी दिन शुरु हुने वताइएको सो इलेक्ट्रिक क्रसओभरले नेपाली इभी पारखीलाई नयाँ विकल्प दिएको छ । ३० देखी ४० लाख हाराहारीको वजेट इभीमा सी३ को सुरुवाती इनिङ सन्तोषजनक देखिएको छ । सो मूल्यको रेन्जमा टाटा नेक्सन र नेटा भीले राम्रो बजार लिइरहेको छ भने यो नयाँ कारले भोलीका दिनमा पनि राम्रो प्रतिक्रिया पाउने आँकलन गर्न सकिन्छ ।

ई–सी३ लाइभ र फील गरी कुल दुई भेरिएन्टमा नेपाल आउन लागेको हो । जसको मूल्य क्रमश ३२ लाख ९९ हजार र ३४ लाख ९९ हजार रुपैयाँ निर्धारण गरिएको छ । कारमा २९.२ किलोवाट आवरको व्याट्री प्याक जडान गरिएको छ भने यसको पावर ५७ एचपी र टर्क १४३ एनएम छ । यसलाई एकपट फुल चार्ज गरेपछि ३२० किलोमिटर गुडान सकिन्छ । ३.३ किलोवाटको एसी चार्जरले १० घन्टा ३० मिनेटमा फुल चार्ज गर्न सकिने ई–सी३ लाई डीसी फास्ट चार्जरको साहयतामा ५७ मिनेट भित्रै ८० प्रतिशत चार्ज गर्न सकिन्छ ।

अत्याधुनिक प्रविधि र कनेक्टिभिटी सुविधाहरू सहितको ई–सी३ मा टचस्क्रिन इन्फोटेनमेन्ट प्रणाली, स्मार्टफोन इन्टिग्रेसन र ड्राइभर–असिस्ट सिस्टमहरू रहेको छ । सो कारलाई १०७ किलोमिटर प्रतिघन्टाको उच्च गतीमा हाँक्न सकिन्छ । यसमा रिजेनेरेटीभ ब्रेकिङ सिस्टमसहित इको र स्ट्याण्डर्ड गरी दुई ड्राइभिङ मोड पाउन सकिन्छ ।

सांग्रिला मोटर्सले कम्वसन इन्जिनमा एयरक्रस सी५ र सी३ बिक्री गर्दै आएपनि यी गाडीले राम्रो बजार पाउन सकिरहेको छैन । यस्तोमा हाल अत्याधिक माग रहँदै आएको इभी सेग्मेन्टमा नयाँ कारलाई उतारेर कारोवार थाल्दै गर्दा कम्पनीसामू बिक्री पछिको सेवा र चार्जिङ पूर्वाधार निर्माणमा पनि उत्तिकै जोड दिनुपर्ने चुनौती थपिएको छ ।