अमेरिकामा चिनियाँ अटो उद्योगविरुद्ध कडाइ कायम राख्न दबाब, जनरल मोटर्स र टोयोटा समेतको संलग्नता

अमेरिका, जापान तथा अन्य अन्तर्राष्ट्रिय अटो निर्माता कम्पनीहरूको प्रतिनिधित्व गर्ने व्यापारिक समूहहरूले चिनियाँ अटो उद्योगमाथि लगाइएका आयात प्रतिबन्धहरू कायम राख्न अमेरिकी राष्ट्रपति डोनाल्ड ट्रम्प प्रशासनलाई आग्रह गरेका छन्। उनीहरूले यस्तो कदमलाई अमेरिकाको प्रतिस्पर्धात्मकता, राष्ट्रिय सुरक्षा तथा अटो औद्योगिक आधारको संरक्षणसँग जोडेर हेरेका छन्।

यी समूहहरूले यस महिनाको सुरुवातमा पठाएको पत्रमा चिनियाँ अटो उद्योगले अमेरिकी बजारमा प्रवेश गर्न खोज्नु “अमेरिकाको विश्वव्यापी प्रतिस्पर्धा, राष्ट्रिय सुरक्षा र औद्योगिक संरचनामा प्रत्यक्ष खतरा” हुने उल्लेख गरेका छन्। पत्रमा निष्पक्ष व्यापार र प्रतिस्पर्धाको पक्षमा रहेको जनाउँदै चीनको अटो उद्योगले ती मापदण्डहरू पालना नगरेको आरोप लगाइएको छ।

उक्त पत्रमा एलायन्स फर अटोमोटिभ इनोभेसन लगायत पाँच प्रमुख संस्थाहरूले हस्ताक्षर गरेका छन्, जसका सदस्यमा जनरल मोटर्स र टोयोटा जस्ता कम्पनीहरू समावेश छन्।

पत्रमा सम्बोधन गदैै पूर्व राष्ट्रपति बाइडेनको शासनकालमा रहेका प्रावधान यथावत राख्न आग्रह गरिएको छ, जसअनुसार चीन र रुसबाट आउने सफ्टवेयरलाई अमेरिकी सवारी साधनमा प्रयोग गर्न निषेध गरिएको छ।

यी नियमहरू मार्च २०२५ देखि लागू भएका हुन् र विशेषगरी कनेक्टेड भेइकल सफ्टवेयर तथा स्वचालित ड्राइभिङ प्रणालीमा केन्द्रित छन्। यद्यपि, यी प्रावधानहरू व्यावसायिक सवारीसाधनमा लागू हुँदैनन्।

हाल अमेरिकी सडकमा चीन वा रुसको सफ्टवेयर प्रयोग भएका सवारीसाधनको संख्या निकै न्यून भए पनि सम्भावित जोखिमलाई ध्यानमा राख्दै यस्तो नीति अपनाइएको हो। अमेरिकी वाणिज्य विभागले हालैदेखि चिनियाँ सफ्टवेयरको प्रयोग पूर्ण रूपमा प्रतिबन्धित गरेको छ।

यद्यपि चिनियाँ सवारीसाधनहरूमा उच्च भन्सार शुल्क लाग्ने भए पनि तिनको मूल्य तुलनात्मक रूपमा सस्तो भएकाले अमेरिकी बजारमा प्रतिस्पर्धी बन्न सक्ने चिन्ता व्यक्त गरिएको छ।

यसैबीच, राष्ट्रपति ट्रम्पले जनवरीमा मिशिगनमा आयोजित कार्यक्रममा चिनियाँ अटो कम्पनीहरूलाई अमेरिकी बजारमा प्रवेश गर्न खुला दृष्टिकोण राख्ने संकेत दिएका थिए, जसले उद्योगमा थप चासो र चिन्ता उत्पन्न गरेको छ।

अमेरिकी अटो उद्योगले क्यानडाको पछिल्लो नीतिप्रति पनि चिन्ता व्यक्त गरेको छ । क्यानडा सरकारले चिनियाँ विद्युतीय सवारीमा भन्सार दर घटाएर ६.१ प्रतिशतमा झारेको छ। यसले चिनियाँ गाडीहरू क्यानडामार्फत अमेरिका प्रवेश गर्न सक्ने आशंका बढाएको छ।

त्यसैगरी, वाशिंगटन राज्यले हालै पारित गरेको कानुनअनुसार ईभी निर्माता कम्पनीहरूले डिलर नेटवर्क बिना सिधै ग्राहकलाई गाडी बेच्न पाउने व्यवस्था गरिएको छ। यसलाई एलायन्स फर अटोमोटिभ इनोभेसनले विरोध गर्दै यस्तो कदमले डिलर नेटवर्क नभएका चिनियाँ कम्पनीहरूलाई फाइदा पुग्ने जनाएको छ।

सोही संस्थाका अध्यक्ष तथा सीईओ जोन बोजेलाले उक्त कानुनलाई “भविष्यमा चिनियाँ अटो कम्पनीहरूलाई अमेरिकी बजारमा डिलर प्रणाली बाइपास गरेर प्रवेश गराउने कानुनी बाटो” को रूपमा टिप्पणी गरेका छन्।

समग्रमा, अमेरिकी अटो उद्योग चिनियाँ कम्पनीहरूको सम्भावित प्रवेशलाई लिएर सतर्क अवस्थामा रहेको छ र सरकारसँग कडा नीतिहरू कायम राख्न निरन्तर दबाब दिइरहेको छ।