चीनमा इमर्जिङ न्यु इनर्जी भेइकलको सूची सार्वजनिक, नेपालमा उपलब्ध अधिकांश मोडल सूचीमा

चीनमा इमर्जिङ न्यु इनर्जी भेइकल (एनईभी) निर्माता कम्पनीहरुले सन् २०२४ को उपलब्धि सार्वजनिक गरेका छन् । यससँगै चीनमा यस्ता कम्पनीहरु मध्ये सबैभन्दा राम्रो परफर्मेन्स गर्ने कम्पनीहरुको सूची समेत सार्वजनिक भएको छ ।

सार्वजनिक सूची अनुसार लि अटो, हार्मोनी इन्टेलिजेन्ट मोबिलिटी एलायन्स (हिमा) र जीएसी एयोनले टप थ्रीको दावी गरेका छन् । यी तीन कम्पनीले समग्रमा यो वर्ष ३ लाख ५० हजार सवारी साधन बिक्री गरेका छन् । चीनमा यो वर्ष यस्ता न्यु इनर्जी प्यासेन्जर भेइकल १ करोड १० लाख युनिट बिक्री भएको बताइएको छ ।

इमर्जिङ न्यु इनर्जी अटो निर्माता कम्पनी भन्नाले इलेक्ट्रिक र प्लग–इन हाइब्रिड सवारी साधन उत्पादन गर्ने नयाँ कम्पनीहरुलाई जनाउँछ, जुन केही समय यता मात्र अस्तित्वमा आएका हुन् । परम्परागत डिजेल वा ग्यासोलिन इन्जिन कार उत्पादन गर्ने कम्पनी भन्दा यस्ता कम्पनीहरुको पहिचान नै फरक हुन्छ । चीनमा सामान्यतः नियो, लि अटो र एक्सपेङ लगायतका ब्रान्डलाई यो श्रेणीमा राख्ने गरिन्छ ।

ली अटोले सन् २०२४ मा ५ लाख सवारी साधन बिक्री गरेको छ, जुन अघिल्लो वर्ष भन्दा करिव ३३ प्रतिशत बढी हो ।

हिमा अन्तर्गतका कम्पनीले यो वर्ष ४ लाख ४५ हजार कार बिक्री गरे । हिमा अन्तर्गत एइटो, लुक्सिड, मेक्स्ट्रो र स्टेलाटो ब्रान्ड पर्छन् । यसमा पनि सबैभन्दा बढी बिक्रीको योगदान एइटोको छ । १२ महिनाको अवधिमा एइटो एम९ मोडलका लागि २ लाख अर्डर आएकोमा यसको डेलिभरी १ लाख ९० हजार युनिट गरिएको छ । एइटो सेरेस र हुवावेको संयुक्त लगानीको कम्पनी हो ।

जीएसी एयोनको बिक्री ३ लाख ५४ हजार युनिट पुगेको छ । यद्यपि सन् २०२३ मा ४ लाख ८० हजार युनिट बिक्री भएको सो कारको बिक्री तुलनात्मक रुपमा १४ प्रतिशतले घटेको छ ।

सूचीको चौथो नम्बर देखि क्रमशः लिपमोटर, दिपल, जिकर, नियो, एक्सपेङ, शाओमी लगायतका ब्रान्ड छन् ।

यी सबै ब्रान्ड मध्ये अधिकांश ब्रान्ड नेपाली बजारमा समेत उपलब्ध छन् ।

सन् २०२५ पनि यी सबै ब्रान्डका लागि चुनौतीपूर्ण हुने देखिएको छ । धेरै कम्पनीहरुले प्राइस वार गर्ने संकेत गरिसकेका छन् र त्यसै अनुसार तयारी अगाडि बढाइरहेका छन् ।