एक चाइनिज कम्पनीले बनायो रेन्ज रोभरको प्रतिलिपि, सामाजिक सञ्जालमा भाइरल

विभिन्न प्रतिष्ठित कम्पनीका उत्पादन नक्कल गर्नमा समेत चिनियाँ कम्पनी लोकप्रिय छन् । अहिले यस्तै एउटा नक्कलले चर्चा पाएको छ ।

एक चिनियाँ कम्पनीले रेन्ज रोभर जस्तो देखिने कार निर्माण गरेको छ । सो कम्प्याक्ट कार रेन्ज रोभर जस्तो हुबहु देखिन्छ । हाल सो कार सामाजिक सञ्जालमा भाइरल भइरहेको छ । चिनियाँ कम्पनीले विश्व प्रसिद्ध मोडलको सस्तो प्रतिलिपि निर्माण गर्दै आइरहेको छ ।

सो कारमा रेन्ज रोभरको सबै डिजाइन नक्कल गरिएको छ । कारको ग्रिल, हेडलाइट्स, डीआरएलएस, बम्पर र समग्र बक्सी सिल्हुट रेन्ज रोभर जस्तो देखिन्छ । कारको पछाडि स्ट्याक्ड एलईडी टेलल्याम्प र रूफ माउन्टेड स्पोइलर प्रदान गरिएको छ ।

सो कार कम्प्याक्ट साइजको छ, जुन सब ४ मिटर मास मार्केट एसयूभी जस्तै देखिन्छ । यो रेन्ज रोभरको सानो आकारको भेरिएन्ट जस्तो देखिन्छ, जसमा छोटो ह्विलबेस दिइएको छ । यसमा मल्टि-स्पोक अलोय ह्विल दिइएको छ ।

सो कारको इन्जिन र पावरट्रेनको बारेमा जानकारी भने खुलाइएको छैन । यो विद्युतीय गाडी भएको बताइएको छ । कारको ड्राइभर डिस्प्लेमा ब्याट्री एसओसी इन्डिकेटर देख्न सकिन्छ । एक चिनियाँ कम्पनीले यसअघि २०१९ मा पनि रेन्ज रोभरको प्रतिलिपि बनाएको थियो । जसको मुद्दा अदालतमा पुगेको थियो ।