मंसिर २२ गते हुने नाडाको वार्षिक साधारण सभामा प्रमुख अतिथि बन्न अर्थमन्त्रीलाई आग्रह

काठमाडौं – नाडाका अध्यक्ष कृष्णप्रसाद दुलालको नेतृत्वमा गएको ८ सदस्यिय प्रतिनिधिमण्डलले आइतबार अर्थमन्त्री जनार्दन शर्मासँग मन्त्रालयमा भेट गरेको नाडाले जनाएको छ । उक्त भेटघाटमा अध्यक्ष दुलालले सरकारले ल्याएको प्रतिस्थापन बजेटबाट अटोमोबाइल व्यवसायमा सकारात्मक प्रभाव पारेको कारण सवारी साधनहरुको आयातमा आर्थिक बर्ष २०७६/०७७ को तुलनामा आर्थिक बर्ष २०७७/७८ मा सतप्रतिशत वृद्धि भएको र चालु आर्थिक बर्षमा अझ वृद्धि हुने बताउदै सरकारले ल्याएका नीतिहरुको निरन्तरताका लागि समेत आग्रह गरे ।

सो भेटघाट तथा छलफलमा अध्यक्ष दुलालले मिति २०७८ मंसिर २२ गते काठमाडौमा सम्पन्न हुने नाडाको आउदो ४५ औं वार्षिक साधारण सभाको प्रमुख अतिथिका लागि अनुरोध समेत गरेको नाडाले जनाएको छ ।

उक्त छलफलमा उपाध्यक्ष करण चौधरी, महासचिव सुनिल रिजाल, सचिव अनुप बराल, कोषाध्यक्ष सुरेन्द्रकुमार उप्रेती लगायत मोटरसाइकल समितिका सभापति अभिक ज्योति, कन्सट्रक्सन इक्विपमेन्ट, वर्कशप टुल्स एण्ड ट्रयाक्टर समितिका सभापति मिलनबाबु मल्ल तथा एसोसिएसन सचिव सुरेन्द्र प्रधान समेतको उपस्थिति रहेको थियो ।