ओमोडा, जेइको र जेटुर पछि अब चेरीको अर्को सब–ब्रान्ड हुनेछ लेपास

हालै चीनमा सम्पन्न २०२४ चेरी इन्टरनेसनल युजर समिटमा चेरीले अन्तर्राष्ट्रिय बजारका लागि अर्को ब्रान्ड ‘लेपास’ को घोषणा गरेको छ ।

चेरीले लेपासको अर्थ के हो भनेर प्रष्ट्याएको छैन । तर लेपासले ‘धनी, करिज्म्याटिक र उच्च नेटवर्थ भएका सहरी अभिजात वर्ग’ लाई लक्ष्यित गर्ने र सो ब्रान्डको प्रोडक्ट इमेज ‘योङ, स्टाइलिस र टेक–ड्रिभन’ हुने उल्लेख गरेको छ ।

चेरीले लेपासलाई ‘प्रोडक्ट लाइन’ भनेको छ र यो चेरी ब्रान्ड अन्तर्गत रहने बताएको छ । यो चेरीको टिग्गो सिरिजका एसयूभी भन्दा माथिल्लो पोजिसनमा रहने समेत बताइएको छ ।

लेपासको पहिलो मोडल लेपास ८ हुनेछ, जुन चेरी टिग्गो ८ प्रो एसयूभी साइज जस्तै हुनेछ । बजारमा यसको उपलब्धता हुने समय वारेमा भने केही बताइएको छैन ।

लेपास अन्तर्गत कम्बसनका साथै प्लग–इन–हाइब्रिड र फुल्ली इलेक्ट्रिक ड्राइभट्रेन सम्मका सवारी साधन उपलब्ध हुने बताइएको छ ।

चेरी अन्तर्गत विभिन्न ब्रान्ड रहेका छन् । नेपालमा पनि चेरी र यसको सब–ब्रान्ड जेइको समेत एउटै आयातकर्ता एसपीजी अटोमोबाइल्सले बिक्री–वितरण गरिरहेको छ । विश्वका विभिन्न देशमा कुनैमा एउटै आयातकर्ताले यस्ता फरक ब्रान्ड बिक्री गरिरहेका छन् भने कुनैमा एउटैले गरिरहेका छन् ।

ग्लोबल भिजनको साथ दिगो भविष्य निर्माणका लागि ओमोडा एन्ड जेइको इन्टरनेसनल युजर समिट चीनको वुहुमा हालसालै भव्य रूपमा सम्पन्न भएको थियो । उक्त समिट अन्तर्गतको ‘लार्ज–स्केल ग्रिन च्यारिटी साइक्लिङ इभेन्ट’मा संयुक्त राष्ट्र संघका आठौँ महासचिव बान कि–मुनले सहभागिता जनाई आफ्नो भनाइ पनि राखेका थिए ।

सम्मेलनमा ‘ओमोडा एन्ड जेइको’को प्यारेन्ट कम्पनी र आइयुसिएन (इन्टरनेसनल युनियन फर कन्जर्भेसन अफ नेचर) बीच ‘चेरिस नेचर’ नामक ग्लोबल को–अपरेसन प्रोजेक्ट (सहयोग परियोजना)मा हस्ताक्षरसहित परियोजनाको औपचारिक आरम्भ पनि भएको थियो ।

सम्मेलनमा नेपालको तर्फबाट ओमोडा एन्ड जेइको नेपालका ग्राहक तथा उपभोक्ता राजन सापकोटा र मिलन चाम्लिङको पनि सहभागिता रहेको थियो ।