सोलिड–स्टेट ब्याट्री प्रयोग गरिएका चेरी ईभी अर्को वर्षदेखी परिक्षणमा आउने

काठमाडौं– चिनियाँ अटो निर्माता चेरीले आफ्ना विद्युतीय गाडीहरूमा सोलिड–स्टेट ब्याट्रीको वास्तविक सडक परीक्षण सन् २०२७ देखि सुरु गर्ने घोषणा गरेको छ ।

सिचुआनको यिबिनमा आज आयोजित ‘वर्ल्ड पावर ब्याट्री कन्फरेन्स’ मा बोल्दै कम्पनीका अध्यक्ष यिन तोङ्युएले यो नयाँ प्रविधिको विकासका लागि १० अर्ब युआन लगानी गरिने जानकारी दिएका हुन् । सुरक्षाको पूर्ण प्रत्याभूति नभएसम्म कुनै पनि नयाँ प्रविधि गाडीमा प्रयोग नगर्ने कम्पनीको नीति रहेको छ ।

चेरीको नयाँ ‘राइनो एस’ सोलिड–स्टेट ब्याट्रीले एक पटकको फुल चार्जमा १ हजार ५०० किलोमिटरसम्म रेन्ज दिने दाबी गरिएको छ । यस ब्याट्री सेलको ऊर्जा घनत्व ४०० देखि ६०० वाटआवर÷किलोग्रामसम्म रहनेछ र यसको पहिलो सडक परीक्षण एक्सिड ईएस८ स्टेसन वागनमा गरिने जनाइएको छ । पूर्ण सोलिड–स्टेट ब्याट्रीभन्दा अघि, चेरीले सन् २०२६ को चौथो त्रैमासिकदेखि नै ‘राइनो’ सोलिड–लिक्विड (सेमी–सोलिड) ब्याट्री गाडीमा जडान गर्न सुरु गर्न लागेको हो ।

चेरी ग्रुप अन्तर्गतकै अर्को कम्पनी अनवा न्यू इनर्जी टेक्नोलोजीले यसअघि नै इन्जिनियरिङ नमुनाहरूको परीक्षण उत्पादन सुरु गरिसकेको छ भने सन् २०२७ सम्म ५०० वाटआवर÷किलोग्राम क्षमताका ब्याट्रीहरूको ठूलो परिमाणमा उत्पादन सुरु गर्ने लक्ष्य राखेको छ ।

हाल चीनमा सीएटीएल, बीवईडी, जिली र गोसन जस्ता ठूला ब्याट्री तथा अटो निर्माताबीच सोलिड–स्टेट प्रविधिलाई कसले लिड गर्ने भन्नेबारे प्रतिस्पर्धा चलिरहेको छ ।