चेरीसंगको साझेदारीमा जेएलआर फ्रिल्यान्डरको पुनरागमन, पहिलो विद्युतीय एसयूभी सार्बजनिक

चेरी र ज्यागुअर ल्यान्ड रोभर(जेएलआर) मिलेर नयाँ विद्युतीय एसयूभी फ्रिल्यान्डर ८ निर्माण गरका छन् । विगत केही समययता बन्द अवस्थामा रहेको फ्रिल्यान्डर नेम प्लेटलाई जेएलआरले चेरीसंगको साझेदारीमा फिर्ता ल्याएको हो । जसअन्तर्गत, पहिलो मोडल फ्रील्यान्डर ८ इलेक्ट्रिक एसयूभीलाई सार्बजनिक गरिएको छ ।

फ्रिल्यान्डर ८ यस महिनाको सुरुमा सार्वजनिक गरिएको कन्सेप्ट ९७ मा आधारित पूर्ण–विद्युतीय एसयूभी हो । यसमा अपराइट स्ट्यान्स र चारैतिर बलियो प्लास्टिक क्ल्याडिङ भएको बक्सी डिजाइन छ ।

एसयूभीको फ्रन्ट प्यानलमा ‘फ्रिल्यान्डर’ अक्षर उभिएको ब्ल्याङ्क–अफ फेसिया छ, जुन आयताकार एलईडी हेडल्याम्प र मार्कर लाइटहरूको सेटले घेरिएको छ ।

नयाँ आईम्याक्स प्लेटफर्ममा आधारित सो एसयूभी ब्याट्री इलेक्ट्रिक सहित प्लग–इन हाइब्रिड र रेन्ज एक्सटेन्डर पावरट्रेनमा समेत उपलब्ध हुने जनाइएको छ । ८०० भोल्ट आर्किटेक्चरमा तयार पारिएको यस एसयूभीले ३५० किलोवाट सम्मको फास्ट चार्जर सपोर्ट गर्ने बताइएको छ । एसयूभीमा कुन साइजको ब्याट्री जडान गरिनेछ भन्ने विषयमा दुबै कम्पनी मौन रहेका छन् ।

एसयूभीको भित्री भागमा पूर्ण–चौडाइको प्यानोरामिक डिस्प्ले र ठूलो फ्लोटिङ सेन्ट्रल टचस्क्रिन हुने अपेक्षा गरिएको छ । एसयूभीमा हुवोले विकास गरेको लिडार सिस्टम र एडास उपलब्ध हुनेछ ।