चार्ल्स लेक्लेर्कले जिते अष्ट्रेलियन ग्रांपी

अष्ट्रेलियाको मेलबर्नमा हिजो सम्पन्न कार रेस प्रतियोगिता अष्ट्रेलियन ग्रांपी फेरारीका चालक चार्ल्स लेक्लेर्कले जितेका छन् ।

अष्ट्रेलियामा १ हजार ११८ दिन पछि भएको रेसमा लेक्लेर्कले ५८ ल्याप्स एक घण्टा सत्ताइस मिनेट छयालिस सेकेन्डमा पुरा गरेका थिए । त्यस्तै करिब २० सेकेन्ड बढी लगाएर रेड बुलका सर्जियो पेरेजले दोस्रो स्थानमा रेस पुरा गरे भने मर्सिडिजका जर्ज रसेलले तेस्रो स्थान हासिल गरे ।

माइकल शुमाकरसँग संयुक्त कीर्तिमानी सात वल्र्ड ड्राइभर्स च्याम्पियनसिप उपाधि जितेका मर्सिडिजका लुइस ह्यामिल्टन चौथो स्थानमा रहे भने साउदी अरेबियन ग्रांपी बिजेता म्याक्स भर्सटापेन रिटायर हुन बाध्य भएका थिए ।

सिजन अनुसार विश्वका विभिन्न देशमा हुने फर्मुला वान कार रेस हिजो अष्ट्रेलियामा सम्पन्न भएको हो । वर्षभर विभिन्न स्थानमा हुने कार रेस प्रतियोगिता पश्चात अन्त्यमा सबै अंक जोड्दा बढी अंक प्राप्त गर्नेलाई विजेता घोषणा गरिन्छ ।

कार रेस समेत विश्वमा धेरै मानिसहरुले हेर्ने रोचक प्रतियोगिता हो । यसको क्रेज जहिले पनि उत्तिकै छ ।