नयाँ पेट्रोल पम्प खोल्दा अब चार्जिङ स्टेसन पनि अनिवार्य

काठमाडौं – व्यवसायीले अब नयाँ पेट्रोल पम्प खोल्दा त्यसका साथमा चार्जिङ स्टेसन पनि अनिवार्य राख्नु पर्ने भएको छ । ऊर्जा, जलस्रोत तथा सिंचाई मन्त्रालयले तयार पारेको विद्युत खपत वृद्धि तथा खनिज इन्धन न्युनीकरण सम्बन्धी कार्ययोजनामा सो कुरा उल्लेख गरिएको छ।

उक्त कार्ययोजनामा उद्योग,वाणिज्य तथा आपूर्ति मन्त्रालय मातहतको आयल निगमलाई यस सम्बन्धी जिम्मेवारी दिइएको छ। जसको अनुगमन र मूल्यांकन गर्दा पेट्रोल पम्पमा समेत चार्जिङ स्टेसन भएको हुनुपर्ने प्रतिवेदनमा उल्लेख छ।

त्यसैगरी सञ्चालनमा रहेका पेट्रोल पम्पको वार्षिक नवीकरण गर्दा पनि प्राविधिक रूपमा सम्भव भएसम्म चार्जिङ स्टेसन राख्नैपर्ने भएको छ।

इन्धनबाट चल्ने सवारीसाधनका तुलनामा विद्युतीयको प्रयोग ह्‍वात्तै बढ्न थालेपछि पेट्रोल पम्पमा चार्जिङ स्टेसन राख्न सक्ने वा नसक्ने विषयमा बहस सुरु भएको थियो। प्राविधिक रूपले सम्भव देखिएपछि सरकारले यस्तो नीति लिएको हो।

२०७९ साउन १० गतेको ऊर्जा मन्त्रीस्तरीय निर्णयबाट समिति गठन भएको थियो। समिति ऊर्जा मन्त्रालयका सहसचिव मधुप्रसाद भेटुवाल संयोजकत्वमा थियो। समितिमा प्राधिकरणका उपकार्यकारी निर्देशक, वैकल्पिक ऊर्जा प्रवर्द्धन केन्द्रका कार्यकारी निर्देशक नवराज ढकाल, जल तथा ऊर्जा आयोग सचिवालयका सिनियर डिभिजनल इन्जिनियर किरण गौतम र ऊर्जा मन्त्रालयका सिनियर डिभिजनल इन्जिनियर शालिग्राम भण्डारी सदस्यसचिव थिए। प्रतिवेदनलाई एक साताअघि बसेको मन्त्रिपरिषद् बैठकले स्वीकृत गरेको हो।

हाल देशभर नेपाल विद्युत प्राधिकरण तथा अन्य निजी क्षेत्रबाट समेत चार्जिङ स्टेसन राख्ने लहर नै चलेको छ । यद्यपि यस सम्बन्धी स्पष्ट नीतिगत व्यवस्था छैन । आगामी दिनमा उपलब्ध हुने नयाँ नीतिगत व्यवस्थाले चार्जिङ स्टेसन र पेट्रोल पम्प दुवै सञ्चालन गर्ने व्यवसायीहरुलाई पनि फाइदा पुग्ने अनुमान गर्न सकिन्छ ।