उड्ने कार र मानव रोबोट बनाउँदै चांगान

दोस्रो ठूलो चिनियाँ अटोमोबाइल समूह चांगानले अटो ग्वाङझाउ २०२४ मा आफ्नो पछिल्ला इन्टेलिजेन्ट टेक्नोलोजीहरु प्रदर्शन गर्दै उड्ने कार र मानव रोबोट बनाउने आफ्नो महत्वकांक्षी रोडम्याप सार्वजनिक गरेको छ ।

चांगानले आउँदो पाँच वर्षको दौरान करिब ७ अर्ब डलर लगानी गर्ने घोषणा गरेको छ । सन् २०२६ सम्ममा चांगानले उड्ने कार बनाइसकेको हुनेछ भने त्यसको एक वर्ष पछि मानव रोबोट बनाउनेछ जसले स्मार्ट, लो कार्बन मोबिलिटी टेक्नोलोजी कम्पनीमा आफूलाई रुपान्तरण गर्ने गतिलाई तीव्र बनाउनेछ ।

चांगान अटोमोबाइलले यसअघि नै चांगान निभो ई०७ लाई डेब्यु गरेर इन्टेलिजेन्ट अटोमोटिभ रोबोट भिजन अघि बढिसकेको छ । यो एसयूभी संसारकै पहिलो मास प्रड्युस्ड ट्रान्सफर्मर भेइकल हो जुन पूर्ण रुपमा एआईले परिभाषित क्षमताले भरिएको छ । यो मोडल चेतना (इन्टेलिजेन्स)ले भरिएको छ र यसको स्वरुप एउटा बटन थिच्ने बित्तिकै परिवर्तन हुन्छ ।

स्वचालित ड्राइभिङको क्षेत्रमा चांगानले साइसु एर्आ लार्ज मोडल पावर्ड स्मार्ट ड्राइभिङ सिस्टम सार्वजनिक गरेको छ । यो प्रणालीले एआईबाट चल्ने इन्टरेक्टिभ फिचर र अत्याधुनिक क्षमतालाई समायोजन गर्नेछ जसले गर्दा पार्किङ र रिपोजिसनिङमा मद्दत पुर्याउँछ ।

चांगानका भावी मोडलहरुमा हाई लेभल स्मार्ट ड्राइभिङ सिस्टम हुनेछ जसको कम्प्युटिङ क्षमता ५०० टप्सभन्दा बढी हुनेछ र यसले सन् २०२७ सम्ममा चांगानले यो क्षेत्रको नेतृत्वमा पुर्याउनेछ । टीओपीएस (टप्स) को अर्थ ट्रिलियन्स अफ अपरेसन पर सेकेन्ड हो र यसलाई प्रोसेसर वा एआई चिप्सको कम्प्युटेसनल पावर मापन गर्नलाई प्रयोग गरिन्छ ।

चांगानले सन् २०२६ देखि २०३० सम्ममा ३४ अर्ब ५२ करोड डलर लगानी गर्ने र शोध तथा विकासमा थप १० हजार कर्मचारी थप्ने जनाएको छ ।