चेन अवधारणामा शोरुम थप्दै यी डिलर, एउटै डिलरको ४ वटासम्म शोरुम

काठमाडौं उपत्यकामा सवारीसाधनको माग उच्च गतिमा वृद्धि भैरहेको छ । सवारीसाधनको माग बढेसँगै आयातकर्ता कम्पनीको आधिकारिक डिलरका रुपमा व्यवसाय अघि बढाउन इच्छुक व्यवसायी समेत बढिरहेका छन् । हाल उपत्यकामा प्रायः सबैजसो सवारी ब्रान्डले शोरुम संख्या बढाइरहेका छन् । यस्तोमा अधिकांश व्यवसायीले एक स्थानका लागि एउटा मात्र शोरुम सञ्चालन गरिरहेका छन् भने केही यस्ता व्यवसायी पनि छन्, जसले एउटै ब्रान्डको ४ वटासम्म शोरुम सञ्चालन गरिरहेका छन् । यस्ता डिलरले चेन अवधारणमा नयाँ शोरुम थप्दै लगेका हुन् ।

नेपाली बजारमा सर्बाधिक बिक्री हुने मध्ये एक होन्डा ब्रान्डको उपत्यकामा २ दर्जन हाराहारी शोरुम छन् । ती मध्ये ४ ओटा शोरुम बज्र ग्रुप अन्तर्गतको बज्र अटोमोबाइल्सले सञ्चालन गरिरहेको छ । बज्र अटो एक्लैले लगनखेल, कलंकी, महाराजगन्ज र जोरपाटीमा गरी कुल चार स्थानमा होन्डा शोरुम सञ्चालन गर्दै आइरहेको छ । शोरुमसँगै उसले यी चारवटै स्थानमा सर्भिस र स्पेयर पार्ट्सको समेत प्रबन्ध मिलाउने गरेको छ । बज्र अटोमोबाइल्समा प्रकाश बज्राचार्य र उनको परिवार संलग्न छ ।

बज्र अटोपछि यामाहाको पुरानो डिलर रिशिक अटोमोबाइल्सले ३ स्थानमा शोरुम सञ्चालन गरिरहेको छ । रिशिक अटोमोबाइल्सले ललितपुरको कुमारीपाटी, बालकुमारी र बल्खु चोकमा यामाहा शोरुम सञ्चालन गर्दै आइरहेको हो । जसमध्ये बल्खु चोकमा उसले हालैमात्र नयाँ शोरुमको औपचारिक उद्घाटन गरेको छ । रिशिक अटोमाबाइल्सले समेत यी तीनवटै स्थानमा सेल्स, सर्भिस र स्पेयर पार्ट्स सहितको प्रबन्ध मिलाउँदै आएको छ । १२ बर्षसम्म यामाहा मोटरसाइकलको आधिकारिक बिक्रेता एमएडब्लु इन्टरप्राइजेजमा जागिर खाएका मिलन बाबु मल्ल रिशिक अटोमोबाइल्सका सञ्चालक हुन् ।

त्यसैगरी गाडीतर्फ मेगा मोटर्सले उपत्यकाको तीन स्थानबाट निसान र ड्याटसन गाडीको बिक्री गर्दै आइरहेको छ । यो कम्पनीले महाराजगन्ज, बालकुमारी र हालै कलंकीमा समेत शोरुम विस्तार गरेको हो । निसान र ड्याटसन गाडीको डिलर बन्नुअघि मेगा मोटर्सले महाराजगन्जबाटै मारुती सुजुकी कारको आधिकारिक डिलरका रुपमा गाडी बिक्री गर्दै आइरहेको थियो । पछि निसान ड्याट्सनको डिलरका रुपमा कारोबार थालेपछि यो कम्पनीको चर्चा निकै बढेको छ । तीन तीन स्थानमा शोरुम विस्तार गरेको मेगा मोटर्सलाई महेश पालले सञ्चालन गर्दै आइरहेका छन् ।

रेनो गाडीको आधिकारिक डिलर जी मोटर्सले काठमाडौको नक्साल र भक्तपुरको राधेराधेमा शोरुम सञ्चालन गरी रेनो ब्रान्डका गाडीको कारोबार गर्दै आइरहेको छ । रेनो गाडी आयातकर्ता एडभान्स्ड अटोमोबाइलले थापाथलीस्थित एकमात्र शोरुमबाट गाडीको बिक्री गर्दै आए पनि डिलरका रुपमा जी मोटर्सले २ स्थानमा शोरुम सञ्चालन गरी गाडीको बिक्री गर्दै आएको हो । नक्सालमा रहेको शोरुमलाई यसअघि कम्पनी आफैले सञ्चालन गर्दै आइरहे पनि पछि जी मोटर्सलाई जिम्मा लगाएको हो । जी मोटर्सलाई कैलाश बाबु गेलालले सञ्चालन गर्दै आइरहेका छन् ।

इसुजु गाडीको वितरक टाइम्स मोटर्सले पनि बल्खु र गैरीधारामा शोरुम सञ्चालन गरेको छ । इसुजुको आधिकारिक वितरक कन्टिनेन्टल ट्रेडिङ इन्टरप्राइजेज प्रालिको डिलरको रुपमा काठमाडौंको दुई स्थानबाट इसुजुका पिकअप लगायतका विभिन्न सवारी साधन बिक्री भइरहेका छन् । दीपकराज गिरी लगायतको टिमद्वारा टाइम्स मोटर्स सञ्चालित छ ।