नेपालमै सवारी साधन एसेम्वल गर्ने भन्दै सिजी होल्डिङले दर्ता ग-यो नयाँ उद्योग, के होला सम्भावना ?

सुजुकी गाडीको नेपालस्थित आधिकारिक बितरक सीजी होल्डिङले स्वदेशमै सवारी साधन एसेम्बलिङ गर्ने भएको छ । कम्पनीले टु ह्विलर, थ्री ह्विलर र फोर ह्विलर एसेम्वल गर्ने भन्दै नयाँ उद्योग दर्ता समेत गरिसकेको छ ।

बारा जिल्लाको परवनीपुरमा उद्योग खोल्ने भन्दै उसले सीजी अटोमोटिभ्स इन्डस्ट्रिज दर्ता गरेको हो । उद्योगमा १ अर्ब ३१ करोड ६९ लाख लगानी गरी वार्षिक १० हजार युनिट टु ह्विलर, ३ हजार युनिट थ्री ह्विलर र १० हजार युनिट फोर ह्विलर एसेम्बल गर्ने लक्ष्य लिइएको छ ।

स्वदेशमै सवारी साधन उत्पादन गर्ने कम्पनीलाई सहुलियत उपलब्ध गराउने सरकारको घोषणा पछि एसेम्बल प्लान्ट स्थापना गर्न व्यवसायीहरु इच्छुक देखिन थालेका छन् । यसअघि बजाज र टीभीएसले प्लान्ट स्थापना गरि उत्पादन समेत थालिसकेका छन् ।

अन्य टु ह्विलर कम्पनीहरुले समेत उद्योग दर्ता गरिरहेका छन् । फोर ह्विलरको हकमा लक्ष्मी ग्रुपले यसअघि नै उद्योग दर्ता गरिसेकेको छ भने अन्य केही कम्पनीहरुले बैदेशिक लगानी भित्र्याएर उद्योग चलाउने भन्दै उद्योगहरु दर्ता गरेका छन् । यद्यपि सरकारले घोषणा गरेको सहुलियतका बारेमा प्रष्ट ब्याख्या नभएका कारण दर्ता भएर बसेका अधिकांश उद्योगहरु सञ्चालनमा आउन भने सकिरहेका छैनन् ।

कत्तिको सम्भव छ नेपालमै सवारी साधन एसेम्बल
सवारीसाधनको माग दिनप्रतिदिन बढ्दै गएका कारण नेपालमा यस्ता प्लान्ट स्थापना गर्न विभिन्न कम्पनीहरुले इच्छा देखाउँदै आइरहेका छन् । यसअघि टाटा मोटर्सले उद्योग स्थापना गर्ने भनेर तयारी समेत थालिसकेको थियो । तर सरकारको नीतिगत अस्पस्टतालाई दोषी ठहराउँदै तत्कालका लागि एसेम्बल गर्न सम्भव नरहेको भन्दै टाटा पछि हट्यो ।

त्यसोत टाटाले तयारी थालिरहेकै समयमा हुलास मोटर्सले नेपालमा सवारीसाधन उत्पादन गरिरहेको थियो । हुलासले उत्पादन गरेको केही गाडी नेपालमा लोकप्रिय समेत बनेका थिए । तर पछि प्रदूषण मापदण्डका कारण हुलास मोटर्स समेत बन्द भयो र यहाँपनि सरकारी नीति र सहयोग नै बाधक बनेको प्रष्ट देखिन्छ ।

सवारी साधन उत्पादनका लागि हजारौ प्रकारका स्पेयर पार्ट्स जरुरत हुन्छ । तर नेपालमा त्यस्ता पार्ट्सको उत्पादन शून्य अवस्थामा छ । यस्तो अबस्थामा बाहिरबाट सबैप्रकारका स्पेयर पार्ट्स आयात गरी यहाँ एसेम्वल मात्रै भने गर्न सकिने अबस्था छ । त्यसका लागि सरकारी तवरबाट सहयोग र सहुलियत उपलब्ध गराउनुपर्ने व्यवसायीहरुले बताउँदै आइरहेका छन् ।