रोयल इनफिल्ड मोटरसाइकलमा अव सिएफ मोटोको इन्जिन

रोयल इनफिल्डले आफ्नो नयाँ पुस्ताको २५० सिसी मोटरसाइकलमा चिनियाँ टु–ह्विलर उत्पादक सिएफ मोटोबाट इन्जिन लिने भएको छ ।

मिडिया रिपोर्टका अनुसार रोयल इनफिल्डले आफ्नो नयाँ जेनेरेसन आइसिई र इलेक्ट्रिक मोडलका लागि पावरट्रेन, हाइब्रिड सिस्टम र इलेक्ट्रोनिक्सको खोजी गरिरहेको छ । सोही क्रममा कम्पनीले सिएफ मोटोसंग छलफल अघि बढाएको हो ।

रोयल इनफिल्डका शीर्ष कार्यकारीहरूले हालै सांघाई मोटर शोको क्रममा सिएफ मोटो र अन्य आपूर्तिकर्ताका प्रतिनिधिहरूलाई भेट्न चीनको यात्रा गरेका थिए ।

सिएफ मोटोद्धारा विकास गरिएको इन्जिन कम्प्याक्ट र इन्धन किफायती हुने कारण सजिलै हाइब्रिड प्रणालीमा एकीकरण गर्न सकिनेछ । इन्जिन सिएफ मोटोबाट लिने योजना बनाएपनि रोयल इनफिल्डले चेसिस, सस्पेन्सन र डिजाइन भने पूर्ण रूपमा भारतमै तयार गर्ने योजना बनाएको छ ।

नयाँ भी प्लेटफर्ममा आधारित उत्पादनहरू हन्टर ३५० भन्दा तल रहने र मुल्य १ लाख २५ हजारदेखी १ लाख ३५ हजार भारुसम्म पर्ने अनुमान गरिएको छ । रोयल इनफिल्डले २०३० सम्ममा आफ्नो वार्षिक उत्पादन १० लाखबाट २० लाख युनिटमा दोब्बर बनाउने लक्ष्य राखेको छ, जसमा नयाँ भी प्लेटफर्मले ७५० सीसी रेन्ज र ईभी सामेल हुनेछन् ।