एक्सटेन्डेड–रेन्ज हाइब्रिडका लागि पहिलो पटक चाइनिज कम्पनी सीएटीएलले ल्यायो नयाँ ब्याट्री

चाइनिज ब्याट्री निर्माता कम्पनी सीएटीएल (क्याटल) ले एक्सटेन्डेड–रेन्ज हाइब्रिडका लागि पहिलो उत्पादन गरेको पहिलो ब्याट्री सार्वजनिक गरेको छ । सबै सेगमेन्ट मध्ये यो क्याटागोरीका इलेक्ट्रिक कारको बिक्री बढिरहेको समयमा सीएटीएलले ब्याट्री उत्पादन गरेको हो ।

फ्रिभोय नामक सो विश्वकै पहिलो हाइब्रिड ब्याट्रीको रेन्ज ४०० किलोमिटर अर्थात २४९ माइल रहेको सीएटीएलका चिफ टेक्नोलोजी अफिसर गाओ हुआनले बताए । उनका अनुसार सो ब्याट्री लि अटो लगायतका विभिन्न चाइनिज ईभी ब्रान्डमा प्रयोग भइरहेको छ र आगामी दिनमा जिली र चेरी जस्ता सो क्षेत्रका प्रतिष्ठित कम्पनीका उत्पादनमा समेत प्रयोग हुनेछ । करिव ३० एक्सटेन्डेड–रेन्ज हाइब्रिड मोडलमा यसको प्रयोग हुने गाओले प्रेस कन्फ्रेन्समा बताए ।

एक्सटेन्डेड–रेन्ज हाइब्रिड अर्थात ईआईभीमा अन्य हाइब्रिड कारमा भन्दा ठूलो ब्याट्री प्याक प्रयोग गरिन्छ । यी कार विद्युतको सहायताले चल्छन् र चार्ज कम भएको समयमा पावर बैंकको रुपमा यसमा भएको ग्यासोलिन इन्जिनले ब्याट्री रिचार्ज गर्नका लागि सहयोग गर्छ ।

पछिल्लो समयमा धेरै चाइनिज उपभोक्ताहरुले ईआरईभी मन पराउन थालेका छन् । यसको ड्राइभिङ रेन्ज ईभीको भन्दा धेरै हुन्छ र मूल्य समेत ग्यासोलिन कार भन्दा कम हुन्छ ।

ईआरईभीको बिक्री समेत यो वर्षको ९ महिनामा गत वर्षको यही अवधिको तुलनामा दोब्बर भन्दा बढी भएको छ । चीनका प्रतिष्ठित कम्पनी लिप मोटर र लि अटोले यही वर्ष मात्र १० भन्दा बढी मोडलका ईआरईभी लन्च गरेका छन् ।

चाइनिज कार निर्माता कम्पनीका साथै विश्वका अन्य कम्पनीहरुले समेत बढी माग गरेकै कारण सीएटीएलले सो ब्याट्रीको उत्पादन गरेको हो ।