अब आइफोनबाट पनि नागरिक एप चलाउन सकिने, सवारीसाधनको जानकारी लिन र कर तिर्न सकिने

काठमाडौं – आइफोन प्रयोगकर्ताहरुका लागि नागरिक एपले नयाँ अपडेट सार्वजनिक गरेको छ । नागरिक एपको पछिल्लो आईओएस भर्सन १.९.८ एप स्टोरमा सो अपडेट उपलब्ध भएको छ ।

अब आईफोन प्रयोगकर्ताले एप स्टोरमा गएर नागरिक एपको नयाँ अपडेट डाउनलोड गर्न सक्ने छन् । नागरिक एपका अनुसार नयाँ अपडेटमा आफ्नो सवारीसाधनको जानकारी हेर्न, बाँकी तिर्नुपर्ने कर र तिरिसकेको कर बारे जानकारी लिन सकिने छ ।

नागरिक एपको एन्ड्रोइड संस्करणमा यो सुविधा यसअघि नै उपलब्ध भइसकेको छ । अब नागरिक एपबाट सवारीसाधनको कर तिर्न र नवीकरण गर्न सकिने छ ।

एपमा पहिलो चरणमा बागमती प्रदेश (बागमती र नारायणी अञ्चल) का सवारीसाधनको कर तिर्न तथा नवीकरण गर्न सकिने छ । त्यसपछि क्रमशः अरू प्रदेश पनि थप्दै जाने नागरिक एपको योजना रहेको बताइएको छ ।