मेगावाट स्तरका १५ हजार फास्ट चार्जर जडान गर्न बीवाईडीले गर्यो नयाँ साँझेदारी

विश्वको सबैभन्दा ठूलो ईभी निर्माता बीवाईडी पछिल्लो समय चार्जिङ पूर्बाधारमा गरेको असाधरण विकासका कारण चर्चामा छ । कम्पनीले केही समयअघि मात्रै मेगावट स्तरका चार्जिङ पूर्बाधार निर्माण गर्ने घोषणा गरेको थियो । यी सुपर फास्ट चार्जरले मात्र ५ मिनेट चार्ज गरेपछि ४०० किलोमिटर रेन्ज प्रदान गर्दछ ।

बीवाईडीले २०२५ को ग्वाङ्डोङ–हङकङ–मकाओ अटो शोमा मेगावाट स्तरका १० हजारवटा चार्जर निर्माण गर्ने पहलको सुरुवात समारोहमा आफ्नो राष्ट्रिय मेगावाट चार्जिङ पूर्वाधार विस्तारमा उल्लेखनीय प्रगतिको घोषणा गरेको छ ।

कम्पनीले प्रमुख चार्जिङ अपरेटरहरू सियाओजु चार्जिङ र सिन्डिएतुसँग नयाँ साझेदारी गरी निकट भविष्यमा थप ५ हजार युनिट यस्ता चार्जर थप्ने र कुल १५ हजार पुर्याउने उद्घोष गरेको हो ।

यी रणनीतिक सहकार्यले चीनभरि मेगावाट चार्जिङ स्टेशनहरूको निर्माणलाई तीव्र पार्ने विश्वास लिइएको छ । विद्युतीय सवारी साधन प्रयोगकर्ताहरूको लागि अल्ट्रा–फास्ट चार्जिङलाई व्यापक रूपमा पहुँचयोग्य बनाउन बीवाईडीले नयाँ प्रबिधीमा लगाव र लगानी दुबै बढाएको छ ।

बीवाईडीले यसअघि ४ हजार वटा मेगावाट स्तरका चार्जिङ स्टेशनहरू निर्माण गर्ने प्रतिबद्धता जनाएको थियो । जसअनुसार, उसले हालसम्म २०० भन्दा बढी प्रमुख शहरलाई समेटेर ५०० भन्दा बढी स्टेशनहरू पूरा गरिसकेको छ ।

बीवाईडीले सहकार्य अघि बढाएको सियाओजु चार्जिङले हाल ८ हजार ४०० भन्दा बढी व्यवसायसंग साझेदारी गरी ३४ मिलियन भन्दा बढी प्रयोगकर्ताहरूलाई सेवा दिँदै आएको छ । यसैबीच, सिन्डिएतुले चीनमा ९० प्रतिशत भन्दा बढी सार्वजनिक चार्जिङ स्टेशनहरूलाई एकीकृत गरिसकेको छ भने ४०० भन्दा बढी शहरहरू उसको पकड कायम छ । यी दुई कम्पनीसंग मिलेलर बीवाईडीले राजमार्ग र शहरी कभरेजलाई सपोर्ट गर्ने थप व्यापक र पहुँचयोग्य मेगावाट चार्जिङ नेटवर्क बनाउने लक्ष्य राखेको छ ।

मेगावाट–स्तरीय चार्जिङ पूर्वाधार तैनाथ गर्न बीवाईडीले गत मार्चमा आफ्नो हान एल र ट्याङ एल मोडेल लन्च गरेपछि सुरुवात गरेको हो ।

बीवाईडीले आफ्नो नेटवर्कलाई अझ विस्तार गर्न र गति कायम राख्न अन्य अग्रणी चार्जिङ अपरेटरहरूसँग सक्रिय रूपमा छलफल गरिरहेको छ । परम्परागत पेट्रोल कारमा इन्धन भर्न लाग्ने समय जत्तिकै छिटो ईभीलाई कसरी चार्ज गर्न सकिन्छ भन्ने विषयमा कम्पनीले खोज र अनुसन्धान गर्दै आएको छ ।