बीवाईडीले बेच्यो एक महिनामै ५ लाख बढी कार, आयमा पहिलो पटक उछिन्यो टेस्लालाई

बीवाईडीले पहिलो पटक एक महिनामै ५ लाख भन्दा बढी युनिट कार बिक्री गर्न सफल भएको छ । बीवाईडीले अक्टोबर महिनामा ५ लाख ५२६ इलेक्ट्रिक प्यासेन्जर भेइकल बिक्री गरेको छ, जुन गत वर्षको यही अवधिको तुलनामा ६६ प्रतिशत बढी हो ।

गत वर्षको अक्टोबर महिनामा बीवाईडीले ३ लाख १ हजार ९५ गाडी बिक्री गरेको थियो । त्यसैगरी गत सेप्टेम्बर महिनाको तुलनामा यो महिना २० प्रतिशत बढी बिक्री भएको हो । गत सेप्टेम्बरमा बीवाईडीले ४ लाख १७ हजार ६०३ गाडी बिक्री गरेको थियो ।

यो वर्षको जनवरी देखि अक्टोबरको अवधिमा बीवाईडीले ३२ लाख ३६ हजार ९२७ इलेक्ट्रिक कार बिक्री गरेको छ, जन गत वर्षको यही अवधिको तुलनामा ३६ प्रतिशत बढी हो ।

बीवाईडीले सन् २०२४ भरीमा ३६ लाख गाडी बिक्री गर्ने लक्ष्य लिएको थियो । यस अनुसार यो लक्ष्य स्वाभाविक रुपमा हासिल गर्ने अनुमान गरिएको छ । बीवाईडीले आन्तरिक रुपमा यो लक्ष्य बढाएर ४० लाख पु¥याउने लक्ष्य लिएको समाचार समेत सार्वजनिक भएका छन् । यद्यपि बीवाईडीले सो लक्ष्य लिएको वारेमा भने केही बताएको छैन ।

यसरी प्रकाशित सेल्स डाटा अन्तर्गत बीवाईडीले बिक्री गरेका न्यु इनर्जी भेइकल (एनईभी) को बिक्री तथ्यांक पर्छन् । यस अन्तर्गत ब्याट्री इलेक्ट्रिक र प्लग इन हाइब्रिड भेइकल पर्छन् । फ्युल सेल इलेक्ट्रिक अर्थात हाइब्रिड भेइकल समेत यसमा परे पनि बीवाईडीले यी भेइकल उत्पादन नगर्ने भएकाले सो डाटामा समावेश छैन ।

पेट्रोलियम पदार्थबाट चल्ने गाडी अर्थात आईसीई कारको उत्पादन भने बीवाईडीले सन् २०२२ को अप्रिल देखि नै बिक्री गर्न बन्द गरेको हो ।

त्यसैगरी बीवाईडीले हालै सार्वजनिक गरेको तेस्रो त्रैमासिक आय अनुसार पहिलो पटक अर्को प्रतिष्ठित कम्पनी टेस्लाको आयलाई समेत उछिनेको छ ।

बीवाईडीले हालै सेप्टेम्बर ३० सम्मको आय सार्वजनिक गरेको छ । यस अनुसार बीवाईडीले २०१.१२ बिलियन युआन अर्थात २८.२४ बिलियन डलर आय गरेको छ, जुन गत वर्षको तुलनामा २४ प्रतिशत बढी हो ।

यसै सन्दर्भमा हालै रोयटर्सले सार्वजनिक गरेको समाचार अनुसार बीवाईडीका एक्जिक्युटिभ भाइस प्रेसिडेन्ट हि झिकीले अगस्ट देखि अक्टोबर सम्मको अवधिमा करिव २ लाख युनिटको दरले उत्पादन वृद्धि गरिरहेको र करिव २ लाख कर्मचारी समेत भर्ना गरिएको बताएका छन् ।

टेस्लाले भने यही अवधिमा २५.१८ बिलियन डलर आय सार्वजनिक गरेको छ । यद्यपि समग्र आयमा भने टेस्ला नै अगाडि रहेको छ ।

बीवाईडी र टेस्ला विश्व बजारमा नै प्रतिस्पर्धी कम्पनीको रुपमा अगाडि बढिरहेका छन् ।