अटो उद्योगलाई ईभीमा सिफ्ट गर्न टेस्ला र बीवाईडी मिल्नु आवश्यक–बीवाईडी कार्यकारी उपाध्यक्ष ली

बीवाईडी विश्वको सबैभन्दा धेरै ईभी निमाण गर्ने कम्पनी हो । विगत पाँच वर्षमा, यसले आफूलाई एक प्रमुख अटोमोटिभ जायन्टका रूपमा स्थापित गर्न गर्न सफल भएको छ । बीवााईडीसंग अहिले टेस्लाले कडा प्रतिस्पर्धा गरिरहेको छ ।

यी दुई ब्रान्ड एकअर्काका प्रतिस्पर्धी भएपनि ईभी बजारलाई उच्च रफ्तारमा विस्तार गर्न एकआपसमा मिल्नुपर्ने धारण बीवाईडीका कार्यकारी उपाध्यक्ष स्टेला लीले राखेकी छिन् ।

उनका अनुसार, दुवै कार निर्माताहरू एकसाथ अघि बढ्ने हो भने भबिष्यमा आईसिई कारको बजारलाई पूर्ण रुपमा ईभीमा सिफ्ट गर्न सकिन्छ । फाइनान्सियल टाइम्ससँगको एक अन्तर्वार्तामा, उनले भनिन्, ‘हाम्रो साझा शत्रु आईसीई कार हो । यस्तो अवसथमा उद्योगलाई परिवर्तन गर्न हामीले सँगै काम गर्न आवश्यक छ ।’

लीले टेस्लासँग मिलेर नयाँ सवारी साधनको सह–विकास गर्ने कुरा गरिरहेकी छैनन् । बरु, उनी विश्वास गर्छिन् कि ईभी निर्माताहरूले अटो उद्योगलाई अगाडि बढाउन सँगै काम गर्न सक्छन् ।

उनले चिनियाँ कार बजार ’नवप्रवर्तनको लागि मातृभूमि’ भएको र युरोपेली संघ र अमेरिकासँग बढ्दो मतभेदका बाबजुद पनि सरकारले चीनमा विस्तार गर्न चाहने विदेशी कम्पनीहरूलाई सहयोग गर्ने बताइन् ।

युरोपेली संघले बीवाईडी र अन्य चिनियाँ ईभी निर्माताहरूमा शुल्क लगाएको छ र अनुदानको बदलामा चिनियाँ कम्पनीहरूलाई बौद्धिक सम्पत्ति युरोपेली व्यवसायहरूमा हस्तान्तरण गर्न दबाब दिइरहेको छ । अर्कोतर्फ, चिनियाँ सरकारले स्थानीय कम्पनीहरूलाई विदेशी निर्माताहरूमा आफ्नो लगानी सीमित गर्न सक्रिय रूपमा प्रोत्साहित गरिरहेको छ ।

युरोपेली आयोगले युरोपेली बजारमा चीनको वृद्धि उत्पादन प्रक्रियाभरि विभिन्न अनुदानहरूको कारणले भएको बताएको छ । यसमा राज्य–स्वामित्वमा रहेका उद्यमहरूबाट छुट प्राप्त लिथियम र ब्याट्री आपूर्ति, कर छुट, राज्य–नियन्त्रित बैंकहरूबाट अनुकूल वित्तपोषण, र कारखानाहरू निर्माण गर्न सस्तो जग्गा पनि समावेश छ । यी समस्याहरूको बावजुद, बीवाईडीले हंगेरी र टर्कीमा प्लान्टका लागि आफ्नो योजनालाई अगाडि बढाइरहेको छ ।