बेलायतमा बीवाईडीको दबदबा, ‘फ्ल्यास चार्जिङ स्टेशन’ को सफल परीक्षण

चिनियाँ अटो जायन्ट बीवाईडीले बेलायती बजारमा आफ्नो पकड बलियो बनाउँदै लगेको छ । कम्पनीले बेलायतमा आफ्नो १ लाख औं कार ग्राहकलाई हस्तान्तरण गरेको छ । कम्पनीका कार्यकारी उपाध्यक्ष हे झिकीले सामाजिक सञ्जाल वेइबोमार्फत यसवारे जानकारी दिएका हुन् ।

साथै उनले, बीवाईडी बेलायतको अटोमोबाइल बजारमा ५ प्रतिशत बजार हिस्सा ओगट्ने सबैभन्दा छिटो ब्रान्ड बनेको दाबी समेत गरे ।

सवारीसाधनको बिक्रीसँगै बीवईडीले आफ्नो चार्जिङ नेटवर्कलाई पनि तीव्र गतिमा अघि बढाउने तयारी गरेको छ । कम्पनीले पश्चिम लन्डनको उक्सब्रिजमा बेलायतकै पहिलो ’फ्ल्यास चार्जिङ स्टेशन’ को सफल परीक्षण गरेको छ ।

हाल उक्सब्रिजमा राखिएको चार्जर केवल प्रविधिको प्रदर्शनका लागि मात्र भए पनि बीवईडीले सन् २०२६ को अन्त्यसम्ममा बेलायतभर ३०० वटा यस्ता फ्ल्यास चार्जरहरू स्थापना गर्ने लक्ष्य राखेको छ ।

कम्पनीले युरोपमा ३ हजारसहित विश्वभर ६ हजार वटा यस्ता अत्याधुनिक चार्जिङ स्टेशनहरू बनाउने योजना बनाएको छ । यसअघि चीनमा सेवा सुरु भएको २७ दिनभित्रै बीवाईडीले ५ हजारभन्दा बढी फ्ल्यास चार्जरहरू सञ्चालनमा ल्याइसकेको छ ।