५१० किलोमिटर रेन्ज दिने एट्टो ३ को नयाँ संस्करण, के–के छन् आकर्षण ?

बीवाईडीले आफ्नो लोकप्रिय एसयुभी एट्टो ३ को नयाँ परिमार्जित संस्करण ‘एट्टो ३ इभो’ विश्व बजारमा लन्च गरेको छ । कम्पनीका अनुसार नयाँ मोडल प्रविधि, रेन्ज र कार्यसम्पादनका हिसाबले उल्लेखनीय रूपमा स्तरोन्नति गरिएको छ ।

नयाँ संस्करणमा ७४.८ किलोवाट आवरको ठूलो ब्याट्री प्याक जडान गरिएको छ, जुन अघिल्लो ६०.५ किलोवाट घण्टाभन्दा ठूलो हो । डब्लुएलटीपी मापदण्डअनुसार यसको रेन्ज ५१० किलोमिटर पुगेको दाबी गरिएको छ, जुन अघिल्लो मोडलभन्दा ९२ किलोमिटर बढी हो ।

स्ट्यान्डर्ड भेरिएन्टले ३१३ हर्सपावर र ३८० एनएमको टर्क उत्पादन गर्छ । यसले ० देखि १०० किलोमिटर प्रतिघण्टा गति लिन ५.५ सेकेन्ड मात्र लिने कम्पनीको दाबी छ ।

अल ह्विल ड्राइभ संस्करण अझ शक्तिशाली छ । यसमा दुईवटा मोटरमार्फत ४४९ हर्सपावर र ५६० एनएमको टर्क उत्पादन हुन्छ । सो संस्करणले ० देखि १०० किलोमिटर प्रतिघण्टा गति केवल ३.९ सेकेन्डमा लिन्छ, यद्यपि यसको रेन्ज ४७० किलोमिटरमा सीमित छ ।

चार्जिङ प्रविधिमा सबैभन्दा ठूलो सुधार गरिएको छ । अघिल्लो ४०० भोल्ट सिस्टमको सट्टा ८०० भोल्ट संरचना प्रयोग गरिएको छ, जसले अधिकतम २२० किलोवाट चार्जिङ सपोर्ट गर्छ । कम्पनीका अनुसार १० देखि ८० प्रतिशत चार्ज गर्न २५ मिनेट मात्र लाग्छ ।

डिजाइन र इन्टेरियरमा पनि अपडेट गरिएको छ । बुट स्पेस ४९० लिटर पुगेको छ र अगाडि १०१ लिटरको फ्रङ्क दिइएको छ । १५.६ इन्चको रोटेटेबल टचस्क्रिन र ८.८ इन्च डिजिटल क्लस्टर जडान गरिएको छ । नयाँ इभो संस्करणले प्रतिस्पर्धी इलेक्ट्रिक एसयूभी बजारमा बलियो चुनौती दिने संकेत दिएको छ ।

एट्टो३ को नयाँ संस्करण अवको केही समयपछि नेपाली बजारमा समेत उपलब्ध हुने अनुमान गर्न सकिन्छ । बीवाईडीको नेपालका लागि आधिकारिक वितरक साइमेक्स इंक प्रालिले आगामी नाइमा मोबिलिटी एक्सपोमार्फत यसलाई लन्च गर्नसक्ने सम्भावना रहेको छ ।