तेलको मूल्य बढ्दा बीवाईडीलाई फाइदा, बढायो ईभी बिक्रीको अन्तर्राष्ट्रिय लक्ष्य

मध्यपूर्वमा बढ्दो द्वन्द्वका कारण पेट्रोलियम पदार्थको मूल्य तीव्र रूपमा बढ्दा विद्युतीय सवारीको माग बढिरहेको छ। यही परिस्थितिबाट चिनियाँ इलेक्ट्रिक सवारी निर्माता बीवाईडी र अन्य केही कम्पनीले भने उल्लेखनिय फाइदा लिने संकेत देखिएको छ ।

मिडिया रिपोर्टका अनुसार कम्पनीका संस्थापक तथा अध्यक्ष वाङ चुवान्फुले एक आन्तरिक बैठकमा इन्धनको मूल्य बढे पश्चात कम्पनीको अन्तर्राष्ट्रिय बजारमा हुने बिक्री ‘अर्को लेभल’ मा पुग्ने अपेक्षा गरिएको बताएका छन् । उनका अनुसार अष्ट्रेलिया, न्युजिल्यान्ड र फिलिपिन्स जस्ता देशमा पहिले दुई सातामा हुने बिक्री हाल एक दिनमै हुन थालेको छ ।

यसै तथ्यलाई मनन गरी कम्पनीले आफ्नो वार्षिक बैदेशिक बिक्री लक्ष्य पनि बढाएर १५ लाख सवारीसाधन पु¥याएको छ। यसअघि यो लक्ष्य १३ लाख युनिट मात्र थियो।

यस वर्षको सुरुवाततिर करिब ६० डलर प्रतिब्यारेल रहेको इन्धनको मूल्य हाल १०० डलर भन्दा माथि पुगेको छ । तेलको मूल्य वृद्धि भएपछि इन्धन खर्च घटाउन चाहने उपभोक्ताहरू ईभीतर्फ आकर्षित भइरहेका छन् ।

पछिल्लो सममया विदेशी बजारमा बीवाईडी लगायतका अन्य ईभीको माग बढिरहेको भए पनि चिनियाँ बजारमा भने क्रमशः यसको मागमा गिरावट आइरहेको छ । मूल्यमा भइरहेको तीव्र प्रतिस्पर्धा र अत्यधिक बजार सम्बन्धित गतिविधिहरुका कारण यसमा असर देखिएको बताइएको छ । यो समयमा बीवाईडीले समेत अन्तर्राष्ट्रिय बजारमा ध्यान केन्द्रित गरिरहेको छ ।

यस वर्षको जनवरी–फेब्रुअरी अवधिमा चीनबाट निर्यात भएका नयाँ ऊर्जा सवारी अर्थात ईभी र प्लग–इन हाइब्रिडको संख्या ११० प्रतिशतभन्दा बढी बढेर ५ लाख ८३ हजार युनिट पुगेको छ । विश्लेषकहरूका अनुसार तेलको मूल्य लामो समय उच्च रहिरहेमा ईभीको माग अझ तीव्र रूपमा बढ्न सक्छ।