फोर्ड इकोस्पोर्ट जस्तै बीवाईडी युआन प्रो इलेक्ट्रिक कार

चिनियाँ अटोमोबाइल कम्पनी बीवाईडीले युआन प्रो इलेक्ट्रिक एसयूभी सार्वजनिक गरेको छ । बाहिरबाट हेर्दा फोर्ड इकोस्पोर्ट जस्तै देखिने सो एसयूभीले हाल अन्तर्राष्ट्रिय बजारमा चर्चा पाइरहेको छ ।

फोर्ड इकोस्पोर्टसँगै राख्दा दुवै कारमा कुनै अन्तर देखिदैन । सामान्य कस्मेटिक फरक मात्र देखिने यी दुई कार जुम्ल्याहा जस्ता लाग्छन् । यति सम्म की पछिल्लो भागमा राखिएको स्पेयर टायर समेत उस्तै देखिन्छ ।

यद्यपि कारको अघिल्लो भागमा भने अलग डिजाइन छ । यसका एक स्लिक हेडल्याम्पका साथै एक ईभी विशिष्ट क्लोज–अफ ग्रिल छ । भित्री भागमा एक ठूलो क्याबिन छ । युआन प्रोमा ८ इन्चको डिजिटल इन्स्ट्रयुमेन्ट क्लस्टर र १०.१ इन्च इन्फोटेनमेन्टका साथ मल्टी फङ्सनल फ्ल्याट बटम स्टेयरिङ ह्विल छ । यसमा नवीनतम कनेक्टिभिटी विकल्प उपलब्ध छ । बीवाईडीका अनुसार सो कारलाई ‘ड्रागन फेस ३.०’ डिजाइन ल्यांग्वेज अनुसार डिजाइन गरिएको हो ।

हाल विश्व बजारमै इलेक्ट्रिक भेइकलको लहर चलेको समयमा बीवाईडीले यसलाई दुई ब्याट्री विकल्पका साथ प्रस्तुत गरेको छ । यसमा भएको सानो ३८.९ किलोवाट आवर ब्याट्रीले फुल चार्जमा ३०१ र ठूलो ५०.१ किलोवाट आवरले ४०१ किलोमिटरको रेन्ज दिन्छ । यसमा भएको इलेक्ट्रिक मोटरले २१० एनएमको टर्क र १३६ बीएचपी पावर दिन्छ ।

यसको मूल्य चीनमा ७९ हजार ८ सय देखि ९९ हजार ८ सय युआन सम्म तोकिएको छ ।