४३ लाख ९९ हजारमै आयो बीवाईडी एट्टो २, नाडा अटो शोमा सार्वजनिक

काठमाडौं–बीवाईडीको वहुप्रतिक्षित एसयूभी एट्टो२ लन्च भएको छ । बीवाईडीको नेपालका लागि आधिकारिक वितरक साइमेक्स इंक प्रालिले नाडा अटो शो २०२५ मा एट्टो २ सार्वजनिक गरेको हो । जसको मूल्य ४३ लाख ९९ हजार रुपैयाँ निर्धारण गरिएको छ । प्रधानमन्त्री केपी शर्मा ओलीले सो ईभी सार्वजनिक गरे ।

बीवाईडीको ई–प्लेटफर्म ३.० मा बनेको एट्टो २ मा अल्ट्रा सेफ ब्लेड ब्याट्रीका साथै सेल टु प्याक बडी प्रविधि दिइएको छ । यसमा १२.८ इन्चको रोटेटिङ टच स्क्रिन राखिएको छ भने इन्टेरियर निकै सफाचट र आकर्षक रहेको छ ।

५१.१३ किलोवाट आवार क्षमताको ब्याट्री जडान भएर आएको यस कारले एकपटकको फुल चार्जमा ३१० किलोमिटर रेन्ज दिने दाबी गरिएको छ । ब्याट्रीलाई ७ किलोवाटको एसी र ८२ किलोवाटको डीसी फास्ट चार्जर प्रयोग गरेर चार्ज गर्न सकिन्छ । एट्टो २ मा उपलब्ध १०० किलोवाट क्षमताको मोटरले २९० एनएम टर्क जेनेरेट गर्दछ ।

सुरक्षाका लागि यसमा ६ वटा एयरब्याग, ३६० डिग्री सराउन्ड भ्यू क्यामेरा, हिल होल्ड एसिस्ट र दर्जनौ सेफ्टि फिचर सामेल लेभल–२ एडास दिइएको छ । यस कारले यूरो एनक्यापको क्र्यास टेष्टमा ५ स्टार रेटिङ पाएको छ ।

बीवाइडीले यसमा ५० वाटको वायरलेच चार्जिङ प्याड, सेन्टर कन्सोल स्टोरेज कम्पार्टमेन्ट, पावर्ड एण्ड भेन्टिलेटेड फ्रन्ट सिट, लेदरेट सिट कभर, ८ वटा स्पीकर, वायरलेस एप्पल कार प्ले र एन्ड्रोइड अटो, भोइस असिस्ट, प्यानारोमिक सनरुफ, इलेक्ट्रीक टेलगेट जस्ता आधुनिक फिचर दिएको छ ।

बीवाईडीको एट्टो २ को प्रतिस्पर्धीका रुपमा एमजी एस५, लिपमोटर बी१०, फरथिङ फ्राईडे र हुन्डाई क्रेटा रहेका छन् । साथै, नाडा अटो शोमार्फत नै लन्च भएको अर्को नयाँ विद्युतीय एसयूभी नामी ०६ समेत यसको नजिकको प्रतिस्पर्धी हो ।