एट्टो ३ का साथ दक्षिण कोरियाली बजार प्रवेश गर्दै बीवाईडी

हालै अर्थात जनवरी १३ मा दक्षिण कोरियाली सरकारले चाइनिज न्यु इनर्जी भेइकल निर्माता कम्पनी बीवाईडीको एट्टो ३ लाई इमिसन तथा न्वाइज सर्टिफिकेटसन प्रदान गरेको छ । दक्षिण कोरियाको नेसनल इन्स्टिच्युट अफ इन्भाइरोमेन्टल रिसर्चले सो सर्टिफिकेट प्रदान गरेको हो ।

यस अनुसार बीवाईडी एट्टो ३ ले दक्षिण कोरिया प्रवेशका लागि आवश्यक सबै प्रक्रिया पुरा गरेको छ । यसैगरी बीवाईडीका अन्य ईभी सिल, डल्फिन र सिलायन ७ पनि यो प्रक्रियामा छन् ।

यस प्रकारको सर्टिफिकेसनले इलेक्ट्रिक सवारी साधनको पर्फमेन्सलाई प्रमाणित गरेको मानिन्छ । यसरी प्रदान गरिएको नतिजा अनुसार बीवाईडी एट्टो ३ ले समान्य अवस्थामा ३२१ किलोमिटर र कम तापक्रमको अवस्थामा ३०९ किलोमिटर रेन्ज दिने बताएको छ ।

बीवाईडीले यस सम्बन्धी औपचारिक जानकारी केही दिनमा सार्वजनिक गर्ने अनुमान गरिएको छ । यसका साथमा दक्षिण कोरिया प्रवेश गर्दा यसको मूल्य समेत सार्वजनिक हुनेछ ।

बीवाईडी एट्टो ३ लाई चीनमा युआन प्लस नामले चिनिन्छ । यसको बेस मोडलको मूल्य चीनमा १ लाख १९ हजार ८०० युआन अर्थात १६ हजार ६५० डलर छ । कोरियामा यसको मूल्य ३ करोड ५० लाख कोरियन वन अर्थात करिव २३ हजार ९५० डलर पर्ने अनुमान गरिएको छ ।

दक्षिण कोरियाली ग्राहकले आगामी फेब्रुअरी देखि सो कार चढ्न पाउने अपेक्षा गरिएको छ । कोरियामा बीवाईडी प्रवेश गरे पश्चात अब यसको प्रतिस्पर्धा टेस्लाका साथै हुन्डाई र किया जस्ता घरेलु प्रतिस्पर्धीसँग समेत प्रतिस्पर्धा हुनेछ ।