५२२ किमी रेन्ज दिने बीवाईडी ई६ को खुल्यो बुकिङ : दशैं अफरमा १ लाख छुट र निःशुल्क एसी चार्जर

काठमाडौं – नेपाली बजारमा हालै बिक्रीका लागि उपलब्ध बीवाईडीको इलेक्ट्रिक कार अल न्यु ई६ मा दशैं अफर सहित बुकिङ खुलेको छ । बीवाईडीको नेपालका लागि आधिकारिक वितरक साइमेक्स इंकले ‘इलेक्ट्रिफाइङ दशैं’ नामक अफरका साथ यो गाडीको बुकिङ समेत आधिकारिक रुपमा खुलेको बताएको छ ।

नेपाली बजारमा पहिले देखि नै बीवाईडीका इलेक्ट्रिक गाडी भए पनि हाल सिंगल चार्जमा ५२२ किलोमिटरको रेन्ज दिने अल न्यु बीवाईडी ई६ कार भित्रिएको हो । यो नेपाली बजारमा उपलब्ध इलेक्ट्रिक कार मध्ये सबैभन्दा धेरै रेन्ज भएको कार हो ।

बीवाईडी ई६ मा १०.१ इन्चको मल्टिमिडिया कारप्याड, एसी तथा डीसी फास्ट चार्जिङ, १७५ एमएम ग्राउन्ड क्लियरेन्स र ५८० एमएल स्पेसियस ट्रंक रहेको छ ।

नेपाली बजारमा अल न्यु बीवाईडी ई६ को मूल्य ५७ लाख ५० हजार रुपैयाँ तोकिएको छ । हाल दशैंको अवसरमा यो कारमा १ लाख रुपैयाँ नगद छुट उपलब्ध हुनेछ । यसका साथमा ७.२ किलोवाट आवरको एसी चार्जर समेत निःशुल्क उपलब्ध हुने बताइएको छ ।

पुरानो कुनै पनि ब्रान्डको पेट्रोलियम कारसँग नयाँ अल न्यु बीवाईडी ई६ साट्न समेत सकिने छ । यसरी साट्दा एक्सचेन्ज बोनसको रुपमा समेत निश्चित रकम छुट हुनेछ ।

इलेक्ट्रिक गाडीका लागि विभिन्न बैंकहरुले ८० प्रतिशत सम्म फाइनान्स सुविधा उपलब्ध गराउने गरेका छन् । त्यसैले शुरुमा २० प्रतिशत रकम मात्र डाउन पेमेन्ट गरेर यसलाई आफ्नै गाडी बनाउन पनि सकिन्छ ।

बीवाईडीले हाल काठमाडौंका विभिन्न ६ स्थानका साथै भक्तपुर, पोखरा, लुम्बिनी, बुटवल, चितवन, हेटौंडा, बर्दिवास, इटहरी र विर्तामोडमा एसी फास्ट चार्जर निर्माण गरिसकेको छ भने धनगढी, सुर्खेत, नेपालगन्ज, लमही, मुग्लिङ, वीरगन्ज, धुलिखेल, धरान र विराटनगरमा छिट्टै नै चार्जिङ स्टेसन सञ्चालनमा आउने बताइएको छ । यी स्थानमा ४० किलोवाट आवरको एसी फास्ट चार्जर हुनेछ ।

बीवाईडी अल न्यु ई६ मा ८ वर्ष वा ५ लाख किलोमिटर गुड्दा सम्म ब्याट्री वारेन्टी उपलब्ध हुने साइमेक्स इंकले जनाएको छ ।