आउने भयो होन्डाको ‘बुलेट’ बाइक

होन्डाले मार्च २ मा नयाँ बाइक लन्च गर्ने संकेत दिएको छ । यो नियो–रेट्रो स्टाइल बाइक सीबी३५० को क्याफे रेसर भर्सन हुनेछ । सो बाइकमा ३४८ सीसी सिंगल सिलिन्डर इन्जिन जडान गरिनुका साथै केही अपडेट पनि हुनेछ ।

सो बाइकको विशेषता भनेको यो ई२० फ्युलबाट पनि चलाउन सकिनेछ । ई२० भनेको इथानोल र पेट्रोलको मिश्रण हो, जसमा ८० प्रतिशत पेट्रोल र २० प्रतिशत इथानोल मिश्रण हुन्छ । सो इन्जिनले २०.८ बीएचपी पावर र ३० एनएम टर्क जेनेरेट गर्छ । बाइकमा ५ स्पिड गियरबक्स हुनेछ ।

क्याफे रेसर भर्सन आकर्षक बनाउन डिजाइनमा परिवर्तन गर्ने सम्भावना छ । यदि यसो भयो भने सो बाइकले हाल बजारमा उपलब्ध रोयल इन्फिल्डका बुलेट बाइकलाई टक्कर दिने अनुमान गरिएको छ ।

यसमा नयाँ एलईडी लाइटिङ, सेमी डिजिटल इन्स्ट्रयुमेन्ट कन्सोल, ड्युअल च्यानल एबीएस अपडेट गरिने छ । यद्यपि, बाइकमा टेलिस्कोपिक फ्रन्ट फोक्र्स र पछाडि ड्युअल शक्स, अलोय ह्लिलको साथमा रियर र फ्रन्टमा डिस्क ब्रेक यथावत् रहनेछ ।

यो बाइकको बिक्री मार्चको अन्त्यबाट सुरु हुने अपेक्षा गरिएको छ । लन्चिङ पछि सो बाइकले रोयल इनफिल्ड हन्टर ३५० र जावा ४२ जस्ता रेट्रो बाइकसँग समेत प्रतिस्पर्धा गर्नेछ ।