अनौठो अभियान यो सहरमा : कोभिड खोप लगाउनेलाई ब्रान्ड न्यु कार

विश्वभर कोरोना भाइरसको महामारी फैलिरहेको अवस्थामा विभिन्न देशले आफ्ना नागरिकका लागि खोप अभियान चलाइरहेका छन् । यसै सन्दर्भमा रुसमा भने एउटा अनौठौ अभियान सञ्चालनमा ल्याइने भएको छ ।

रुसको मस्कोमा खोप अभियानमा व्यापकता ल्याउनका लागि नयाँ अभियान चलाइने भएको छ । मस्कोका मेयर सर्गेई सोबयानिनले कोरोना भ्याक्सिन लगाउने व्यक्तिका लागि रुसकै मुद्रा अनुसार करिव १६ लाख रुपैयाँ मूल्य पर्ने ब्रान्ड न्यु कार दिने घोषणा गरेका छन् । घरमा कार लैजान पाइने आशाका कारण धेरै नागरिकले खोप लगाउने अपेक्षा उनले गरेका छन् ।

उनका अनुसार १८ वर्ष भन्दा माथिका कुनै पनि नागरिकले भ्याक्सिन लगाए पछि स्वचालित रुपमा उनीहरुको नाम समावेश हुनेछ । यो अनौठो योजना आगामी जुलाई ११ सम्म चल्ने छ ।

भ्याक्सिनको पहिलो डोज लगाउने व्यक्तिका लागि उपलब्ध हुने कार प्रत्येक साता कमसेकम ५ व्यक्तिलाई लक्की ड्रमार्फत उपलब्ध गराइने छ । यसबाट कुल मिलाएर २० कार उपलब्ध गराइने छ ।

मस्कोमा भएका १ करोड २० लाख नागरिक मध्ये मे २१ सम्म १३ लाख नागरिकले मात्र पहिलो डोज लगाएका छन् । यद्यपि भाइरस संक्रमण लगातार रुपमा बढिरहेको छ ।