६ वर्ष बितिसक्दा पनि डेलिभरी नपाएपछि ग्राहकले फिर्ता मागे कारको बुकिङ रकम

सन् २०१६ मा भारतमा टेस्ला मोडल ३ को बुकिङ खुला भएको थियो, तर हालसम्म पनि टेल्साले भारतीय ग्राहकलाई अझै सो कार उपलब्ध गराउन सकेको छैन । भारतमा टेस्ला मोडल ३ को बुकिङका लागि ग्राहकहरूबाट १ हजार डलर चार्ज गरिएको थियो । यद्यपि, हालसम्म कम्पनीले भारतमा डेलिभरी सुरु गर्न कुनै निश्चित समय सीमा घोषणा गरेको छैन, जसका कारण ग्राहकहरूले बुकिङ रकम फिर्ताको माग गरिरहेका छन् ।

टेस्लाले भारतमा मोडल ३ कार डेलिभर नगरे तापनि अन्य देशमा डेलिभरी भइरहेको छ । रिपोर्टका अनुसार टेस्लाको मोडल ३ कार विश्व बजारमा ३ लाखभन्दा बढी छन्, जसका कारण टेस्लाका मालिक एलन मस्कसँग भारतीय ग्राहकहरु निकै रिसाएको र भारतसँगको उनको व्यापार रणनीतिमाथि प्रश्न उठाइरहेका छन् ।

रिपोर्टका अनुसार टेस्ला मोडल ३ बुक गरेका धेरै ग्राहकहरूले अब रकम फिर्ता मागिरहेका छन् । ग्राहकहरुले टेस्लालाई बुकिङ रकम फिर्ताको लागि धेरै पटक अनुरोध गरिरहेका छन् तर कम्पनीको प्रतिक्रिया एकदमै निराशाजनक रहेको छ । यद्यपि कम्पनीले गत वर्ष केही ग्राहकहरूलाई बुकिङ रकम फिर्ता गरेको थियो ।

टेस्लाले गत वर्ष बेंगलुरुमा आफ्नो कार्यालय खोल्दा भारतमा उत्पादन पुनः सुरु गरेको खबरले तीव्रता पाएको थियो । टेस्लाले सन् २०२१ को सुरुदेखि भारतमा आफ्नो इलेक्ट्रिक कारको उत्पादन सुरु गर्ने बताएको थियो तर पछि टेस्लाले चीनबाट भारतमा कार आयात गर्ने बताएको थियो, तर कम्पनीलाई बिक्री गर्न अनुमति दिइएन ।

यसबाहेक टेस्लाले भारत सरकारसँग करमा विशेष छुटको माग पनि गरेको थियो, जसलाई सरकारले कुनै एक कम्पनीका लागि कर नीति परिवर्तन गर्न नसकिने भन्दै अस्वीकार गरेको थियो । टेस्ला र भारत सरकारबीच टेस्लाको इलेक्ट्रिक कार भारतमा उत्पादन गर्ने विषयमा धेरै चरणको वार्ता भइसकेको छ । तर भारतमा टेस्लाको लगानीको बाटो भने खुल्न सकेको छैन ।