भारत एनक्यापको पहिलो नतिजा सार्वजनिक, टाटा ह्यारियर र सफारीलाई फाइभ स्टार

भारत सरकारले पहिलो पटक क्र्यास टेस्ट ‘भारत न्यु कार एसेस्मेन्ट प्रोग्राम (बीएनसीएपी)’ को पहिलो नतिजा सार्वजनिक गरेको छ । यस अनुसार परीक्षणमा संलग्न टाटा ह्यारियर र सफारीले फाइभ स्टार रेटिङ प्राप्त गरेका छन् ।

बीएनसीएपी अर्थात बीएनक्यापले गत डिसेम्बर १५ देखि परीक्षण प्रारम्भ गरेको थियो । ह्यारियर र सफारी दुवैले एडल्ट अक्यपेन्ट प्रोटेक्सनका लागि ३२ मा ३०.०८ र चाइल्ड अक्युपेन्ट प्रोटेक्सनका लागि ४९ मा ४४.५४ स्कोर पाएका छन् ।

त्यसैगरी साइड मुभेवल डिफोर्मेबल ब्यारियर टेस्टका लागि १६ मा १६ र फ्रन्ट अफसेट डिफर्मेबल ब्यारियर टेस्टमा चेस्ट एरियाको सेफ्टीका लागि १६ मा १४.०८ स्कोर मात्र पाएका छन् ।

यी दुवै एसयूभीले ग्लोबल एनक्यापमा पनि फाइभ स्टार रेटिङ नै पाएका थिए ।

भारत एनक्याप पहिलो पटक प्रयोगमा आएको छ । सो एजेन्सीले भारतीय अवस्था अनुसार निर्धारित मापदण्ड तयार गरी कार क्र्यास गर्न र सुरक्षा रेटिङ दिने तयारी गरेको छ । यस परीक्षणमा कारहरूलाई जिरो देखि फाइभ स्टार सम्म रेटिङ दिइन्छ । जिरो स्टार भनेको असुरक्षित र फाइभ स्टारको अर्थ पूर्ण रूपमा सुरक्षित हुन्छ ।

विश्वमा हाल ग्लोबल एनक्याप, युरो एनक्याप, अष्ट्रेलियन एनक्याप र ल्याटिन एनक्याप गरी चार एजेन्सीले कारको सेफ्टी टेस्ट गर्दै आएका छन् । भारतीय कारलाई भारतीय परिस्थिति अनुसार टेस्ट गर्नुपर्छ भनेर भारत सरकारले नयाँ परीक्षण बीएनक्यापको सुरुवात गरेको हो । यसबाट परीक्षणमा लाग्ने रकममा ७५ प्रतिशत कमी हुने बताइएको छ ।

यसबाट सुरक्षित कार छान्नका लागि ग्राहकलाई सहज हुनेछ । सुरक्षित कार उत्पादनका लागि कम्पनीहरुबीच प्रतिस्पर्धा बढ्ने छ भने परीक्षणका लागि विदेशमा कार पठाउनु पर्ने बाध्यताको पनि अन्त्य हुनेछ ।

सो परीक्षणका लागि भारतमा तीन दर्जन भन्दा बढी मोडल दर्ता भइसकेका छन् । आगामी दिनमा सबैको नतिजा सार्वजनिक हुनेछ ।