अब बस, ट्रक र विमान पानीबाट बनेको इन्धनमा चल्छ ? यस्तो छ बिल गेट्स समर्थित कम्पनीको उपलब्धि

क्यालिफोर्निया स्थित इन्फिनियम कम्पनी कार्बनडाइअक्साइड प्रयोग गरी औद्योगिक स्तरको इन्धन उत्पादन गर्ने विश्वको पहिलो ई–इन्धन निर्माता बन्न सफल भएको छ । रिपोर्टका अनुसार सो कम्पनीले पानीबाट इन्धन बनाउने प्रविधिको विकास गरिसकेको छ । इन्फिनियम कम्पनीले हावा र सौर्य ऊर्जाबाट उत्पादित बिजुली प्रयोग गरी पानीलाई हाइड्रोजन र अक्सिजनमा परिणत गर्ने गरेको प्रतिवेदनमा उल्लेख छ ।

सो प्रविधिमा हाइड्रोजनलाई रिएक्टरमा पठाइ कार्बन डाइअक्साइडसँग मिसाउँछ । यसमा पेटेन्ट प्रोसेस क्याटालिस्ट र रासायनिक प्रतिक्रिया समावेश हुन्छ । त्यसपछि यसलाई सिन्थेटिक इन्धनमा परिणत गरिन्छ जसको गुण जीवाश्म इन्धन जस्तै हुन्छ ।

रिपोर्टका अनुसार इन्फिनियमले करिब ८ हजार ३ सय लिटर इलेक्ट्रो इन्धन उत्पादन गर्ने गरेको छ र अमेरिकाभरका ग्राहकलाई वितरण गरिसकेको छ । ‘नवीकरणीय ऊर्जा र कार्बन डाइअक्साइडबाट बनेको स्वच्छ इन्धन’ भन्ने नारासहितको कम्पनीलाई माइक्रोसफ्टका संस्थापक बिल गेट्सले समर्थन गरेको बताइएको छ ।

मार्च २० मा गेट्सले एक ब्लग पोस्टमा स्वच्छ ऊर्जाको भविष्यमा काम गरिरहेका आविष्कारकलाई भेट्न टेक्सास गएको उल्लेख गरेका छन् । गेट्सले इन्फिनियमको इन्धन विद्यमान ट्रक, जहाज र विमानका इन्जिनमा पनि हाल्न सकिने जानकारी दिएका छन् ।