बजेट लगत्तै मोटरसाइकलको मूल्य वृद्धि, के व्यवसायीले पुरानो स्टकको पनि मूल्य बढाएका हुन् त ?

आगामी आर्थिक वर्षको बजेटमा सरकारले २०० सीसी भन्दा बढी क्षमताका मोटरसाइकलमा भारी मात्राले भन्सार र अन्तःशुल्क वृद्धि गरेपछि अहिले यस्ता मोटरसाइकलको मूल्य धमाधम वृद्धि भैरहेको छ । कतिपय कम्पनीहरुले प्रि–बजेट अफर भनेर पुरानै मूल्यमा मोटरसाइकल उपलब्ध गराउने बताइरहेका छन् भने कतिपयले मूल्य बढाइसकेको सार्वजनिक गरेका छन् । बजेट आएको १० दिनपनि वित्न नपाउँदै मूल्य वृद्धि हुन थालेपछि कतै व्यवसायीयले बजेट अघि आयात गरी ल्याएका पुराना मोटरसाइकलको समेत मूल्य वृद्धि गरेका त होइनन् भनेर प्रश्नहरु उठ्न थालेका छन् ।

बजेट आउनुभन्दा अघि भन्सार पास भएर नेपाल भित्रिएका यस्ता साधनको मूल्य पुरानै कायम हुनुपर्नेमा कतै व्यवसायीले मौकामा चौका हानेर पुरानै स्टकको समेत मूल्य वृद्धि गरेका त हैनन् भनेर शंका गर्ने आधार समेत देखिएको छ । बजेट आएपछि सबैभन्दा पहिले बजाज मोटरसाइकलको आधिकारिक वितरक हंसराज हुलासचन्द एण्ड कम्पनीले २०० सीसी माथि सेग्मेन्टमा सर्वाधिक लोकप्रिय मोडल पल्सर २२० एफ एबीएसमा २० हजार रुपैयाँले मूल्य वृद्धि गरेको छ । यसको नन् एबीएसमा भने उसले पुरानै मूल्य कायम गरेको छ ।

उक्त कम्पनीले जेठ १८ देखि भृकुटीमण्डपमा आयोजना गरेको एक्सचेन्ज मेलामै यो मोटरसाइकलको मूल्य वृद्धि हुने तर मेला अवधिमा खरिद गर्नेलाई पुरानै मूल्यमा उपलब्ध गराउने बताएको थियो । २४ गते मेला सकिए लगत्तै कम्पनीले यो वाइकमा २० हजार रुपैयाँ वृद्धि गरेर नयाँ मूल्य सूची सार्वजनिक गर्यो । मेलाकै क्रममा एभेन्जर क्रुज र डोमिनार २५० को पनि मूल्य वृद्धि भएको भन्दै समाचार वाहिर आएपनि पछि कम्पनीले सार्वजनिक गरेको नयाँ मूल्य सूचीमा भने यी बाइकको मूल्य पुरानै कायम गरिएको थियो ।

बजेट आएको १० दिन पनि वित्न नपाउँदै एउटै मोडलमा २० हजार रुपैयाँसम्मले मूल्य वढेपछि यसलाई अधिकांशले बजेटको असरका रुपमा लिए । तर यो मूल्य बजेटमा गरिएको भन्सार र अन्तःशुल्कको वृद्धिले नभई नियमित प्रक्रियाअनुरुप बढेको कम्पनी स्रोतले बताएको छ । २०१ देखि २५० सीसी सेग्मेन्टमा अन्तःशुल्क २० र भन्सार १० प्रतिशतले वृद्धि हुँदा यो बाइकको मूल्य धेरै अन्तरले बढ्ने देखिन्छ ।

बजाजपछि होन्डा मोटरसाइकलको बिक्रेता स्याकार ट्रेडिङ कम्पनीले सिवी ३५० आर र हाइनेस सिवी ३५० मोडलको मूल्य भारी मात्राले वृद्धि गर्यो । होन्डाले यी बाइकको मूल्य क्रमशः १ लाख र ७४ हजार रुपैयाँ वृद्धि गरेको हो । जसलाई बजेटपछि वृद्धि भएको करले बढाएको हो । बजेट आउनुभन्दा केही समयपहिले यी बाइक सोल्ड आउट भएको बताएको होन्डाले बजेट लगत्तै मूल्य वृद्धि गरेर बिक्री थालेपछि यसको केही युनिट बजेट अगावै भन्सार पास भएर आएको र सोही बाइकमा मूल्य वृद्धि गरिएको अनुमान गर्न थालिएको छ ।

होन्डाको सिको गर्दै त्यसपछि केटीएम, रोयल इन्फिल्ड र क्रसफायरले पनि मूल्य बढाएका छन् । केटीएमले ड्युक २०० र २५० मोडलको मूल्य वृद्धि गरेको छ । यी बाइकमा क्रमशः २० र ८० हजार रुपैयाँ वृद्धि गरिएको हो । जसमध्ये ड्युक २५० मा बजेटको प्रभाव देखिएको हो ।

उता रोयल इन्फिल्डको नयाँ बिक्रेता अल्फा अटोमोटिभ्सले वृद्धि भएको मूल्य सहित नयाँ मूल्य सूची सार्वजनिक गरेको छ । तत्कालका लागि क्लासिक ३५० र मेटियर मोडल मात्र उपलब्ध गराउने योजना बनाएको यो कम्पनीले यी बाइकको मूल्य यसअघिको तुलनामा २ लाख रुपैयाँसम्मले महंगो बनाएको छ । रोयल इन्फिल्डको हालै बिक्रेता परिवर्तन भएको र नयाँ विक्रेताले यी बाइकलाई बजेट अगावै भित्र्याएको र बजेटमा मूल्य वृद्धि हुने अनुमान गर्दै त्यसै अनुसार बजेट पश्चात मूल्य सार्वजनिक गरेको अनुमान पनि कतिपयले गरेका छन् ।

यसैगरी क्रसफायरले पनि तीनवटा मोडलको मूल्यमा भारी मात्राले वृद्धि गरेको छ । नयाँ मूल्य सूची अनुसार यसको आरएम २५० मा १ लाख ४० हजार, एचजे २५० मा १ लाख र ट्रेकर २५० मा ३५ हजार रुपैयाँ वृद्धि भएको छ । क्रसफायरको यी बाइक प्रायः नेपाली बजारमा सर्टेजकै अवस्थामा रहँदै आएका कारण पनि उसले नयाँ लटका लागि मूल्य बढाएको अनुमान लगाउन सकिन्छ ।

यसरी बजेट लगत्तै मुल्य वृद्धि हुनुलाई अर्थपूर्ण रुपमा हेर्नुपर्ने एकजना अटोमोबाइल व्यवसायीले नेपाल अटोलाई बताएका छन् । उनका अनुसार प्रायः सबै व्रान्डसँग कम्तीमा पनि १ महिनाको माग धान्ने स्टक रहने भएपनि बजेट आएको १० दिनपछि बाटै धमाधम मूल्य वृद्धि हुँदै जानुले कतै व्यवसायीले पुरानो स्टकको समेत मूल्य बढाएका त होइनन् भनेर शंका गर्नुपर्ने देखिन्छ । यदि यसो हो भने यसलाई हदैसम्मको नाफाखोरी र वद्मासी मान्नुपर्ने उनको ठम्याई छ । यद्यपि धेरै महंगो मूल्यका बाइक भने पहिले ग्राहकले बुकिङ गरे पछि मात्र ल्याइने भएकाले आगामी दिनमा नेपाल भित्र्याउदा नयाँ भन्सार दर लाग्ने र नेपाल भित्रिन पनि समय लाग्ने कम्पनीहरुले बताउदै आएका छन् । महंगा बाइक कम्पनीहरुले स्टकमा नराख्ने र बुकिङ गरे पश्चात मात्र धेरैले अर्डर गर्ने गरेका हुन्छन् ।

हाल मूल्य वृद्धि भएका यी मोटरसाइकलको स्टक बजेट अघि कुन अवस्थामा थियो भनेर जानकारी दिने कुनै निकाय नभएका कारण पनि यो विषयको टुंगो सहज रुपमा नलाग्ने स्पष्ट देखिन्छ । यसका वावजुद भोलिका दिनमा बजेट अघि र लगत्तै भन्सार पास भएका यी मोटरसाइकलको अवस्था वारेमा सबैलाई जानकारी दिने कुनै निकायको व्यवस्था हुनुपर्ने आवश्यकता भने छ ।