रसुवालाई सडक सञ्जालसँग जोड्न बेलीब्रिज निर्माणको प्रक्रिया अघि बढ्यो

काठमाडौं – रसुवालाई सडक सञ्जालसँग जोड्न बेलीब्रिज प्रयोग गरिने भएको छ । पूर्वाधार विकास मन्त्रालयका अनुसार भोटेकोशी बाढीका कारण रसुवा सडक सञ्जालबाट विच्छेद हुँदा आवतजावत र सामान ढुवानीमा ठूलो समस्यालाई मध्यनजर गरी यो प्रक्रिया अगाडि बढाइएको हो ।

मन्त्रालयका अनुसार रसुवालाई सडक सञ्जालसँग जोड्ने भरपर्दो र द्रुत वैकल्पिक मार्गका रूपमा नुवाकोटको सूर्यगढी गाउँपालिका–२ तल्लो कुवापानी बिमिरेखोलादेखि रसुवाको नौकुण्ड गाउँपालिका ५ वहाखोलासम्म फलाँखुमा ७५ मिटर लामो बेलीब्रिज जोड्ने प्रक्रिया अघि बढाइएको छ ।

सम्बन्धित पालिका अध्यक्षबाट आएको अनुरोधअनुसार बेलीब्रिज निर्माणका लागि मन्त्रालयबाट आवश्यक निर्देशन र सहजीकरण गरिएको मन्त्रालयले बताएको छ ।

बेलीब्रिज निर्माण सम्पन्न भएपछि नुवाकोट रसुवा जोड्ने सबैभन्दा छोटो वैकल्पिक मार्ग तयार हुनेछ। यसबाट फलाँखु खोलाबाट विदुर करिब २३ किलोमिटर र धुन्चे करिब ३५ किलोमिटरको दूरीमा पुग्न सकिनेछ।