वर्षामा कार र बाइकको टायर किन चिप्लिन्छ ?

वर्षायाम चलिरहेको छ । यो मौसममा सवारी साधन चिप्लिएर दुर्घटना हुने खतरा बढि हुन्छ । वर्षायाममा सडकमा जमेको माटो नरम हुने भएकाले एक्कासी ब्रेक लगाउदा तीब्र गतिका सवारीसाधन चिप्लिने डर हुन्छ । वर्षायाममा कारबाट यात्रा गर्दा विभिन्न कुरामा ध्यान दिनुपर्छ ।

वर्षायाममा सवारी साधन सुस्त गतिमा चलाउनु पर्ने विज्ञहरुको भनाइ छ । पानी भरिएको ठाउँमा सवारी साधन अनियन्त्रित हुन्छ । त्यसैले यस्ता ठाउँमा विशेष ध्यान दिनुपर्छ ।

आवश्यक परेको बेलामा कारको टायर परिवर्तन गरिरहनु पर्छ । भिजेको बाटोमा घिस्रिएको टायर लगाएर कार चलाउनु खतरनाक हुन सक्छ । सवारी साधन करिब ११,००० किलोमिटर चलिसकेपछि आफ्नो कारको टायर परिवर्तन गर्नुपर्छ ।

वर्षायाममा कार स्लो गतिमा ड्राइभ गर्नुपर्छ । यो समयमा सामान्यतया सवारी साधनको गति प्रतिघण्टा ५७ किलोमिटरभन्दा बढी हुँदा अनियन्त्रित भएर दुर्घटना हुने विज्ञहरुको भनाइ छ । मनसुनमा सवारी चलाउन तोकिएको गति सीमाभन्दा १० देखि १५ किलोमिटर प्रतिघण्टा कम गतिमा सवारी चलाउनुपर्छ ।

भिजेको सडकमा ड्राइभ गर्दा कारको क्रुज फंक्शन कहिल्यै प्रयोग गर्नु हुँदैन । क्रुज फंक्शन सक्रिय गरेर हाइड्रोप्लेन सुरु गरेमा कारको नियन्त्रण पुनः प्राप्त गर्नु भन्दा अघि फंक्शन बन्द हुन समय लाग्नेछ ।