बजाजको वेबसाइटबाट हट्यो पल्सर एन १५०, के बन्द गर्न लागिएको हो ?

१५० सिसी सेग्मेन्टमा सबैभन्दा पावरफुल मानिने बजाज पल्सर एन १५० लाई कम्पनीले आफ्नो वेबसाइटबाट हटाएको छ । भारतसहित नेपाली बजारमा समेत सबैभन्दा राम्रो कम्युटर बाइक मानिएको यस मोडललाई कम्पनीले आफ्नो वेबसाइटबाट हटाएपछि कतै यसको उत्पादन नै बन्द गर्न लागिएको त हैन भन्ने जिज्ञासा बढ्न थालेको छ ।

पल्सर १५० को स्पोर्टी संस्करणका रुपमा आएको एन १५० ले पछिल्लो समय भारतमा खासै राम्रो बजार लिन भने सकिरहेको थिएन । पल्सरकै १६० सीसी मोटरसाइकल भन्दा पनि कम युनिट बिक्री हुन थालेपछि कम्पनी यसको आगामी यात्रालाई लिएर चिन्तित रहँदै आएको थियो ।

गत महिना बजाजले क्लासिक पल्सर र पल्सर १५० एन गरी जम्मा १५ हजार ९३७ युनिटमात्रै बिक्री गरेको थियो । जुन, सोही महिनामा बिक्री गरिएको पल्सर एन १६० र एनएस१६० भन्दा ७ हजार युनिट कम थियो ।

कुनै समय बजाज ब्रान्डको गरिमा वनेर बजारमा एकछत्र राज गर्दै आएको पल्सर १५० लाई कम्पनीले तत्कालै बन्द भने गरिहाल्न नसक्ने रिपोर्टहरु समेत बाहिर आएका छन् । केही मिडिया रिपोर्टका अनुसार कम्पनीले यसको अपग्रेडेड भर्सनलाई अपग्रेड गरेर ल्याउने तयारी गरिरहेका कारण तत्कालका लागि यसलाई कम्पनीको वेबसाइटबाट हटाइएको हो ।

पल्सर एन नेपाली बजारमा समेत बिक्री हुँदै आएको मोटरसाइकल हो । बजाजको नेपालका लागि आधिकारिक वितरक हंसराज हुलासचन्द एन्ड कम्पनी प्रालिले यसको मूल्य ३ लाख ६५ हजार रुपैयाँ निर्धारण गरेर बिक्री गर्दै आएको छ ।