बजाज पल्सर २२०एफ र टीभीएस अपाचे आरटीआर २०० ४भी मा कुन किन्ने ? यस्तो छ भिन्नता

बजाज पल्सर र टीभीएस अपाचे जस्ता २०० सीसीका बाइक फरक फरक सोच र प्रयोगकर्तालाई लक्षित गर्दै आफ्नो उपस्थिति मजबुत बनाएका छन् । बजाजले नयाँ अपडेटसहित पल्सर २२०एफ पुनः बजारमा उतारेको छ भने टीभीएसले २०२५ का लागि अपाचे आरटीआर २०० ४भी लाई नयाँ टीएफटी डिस्प्ले र अत्याधुनिक प्रविधिसहित अझ परिष्कृत बनाएको छ।

बजाज पल्सर २२०एफ मा २२० सीसी क्षमताको एयर र आयल–कूल्ड सिंगल सिलिन्डर इन्जिन प्रयोग गरिएको छ। यसले ८५०० आरपीएममा २०.९ पीएस पावर र ७००० आरपीएममा १८.५५ एनएम टर्क उत्पादन गर्छ । टीभीएस अपाचे आरटीआर २०० ४भी मा १९७.७५ सीसी इन्जिन छ, जसले स्पोर्ट मोडमा ९००० आरपीएममा २०.८२ पीएस पावर र ७२५० आरपीएममा १७.२५ एनएम टर्क दिन्छ।

सस्पेन्सन र ब्रेकिङ सेटअपमा यी दुईबीच स्पष्ट भिन्नता देखिन्छ। पल्सर २२०एफ मा अगाडि टेलिस्कोपिक फोर्क र पछाडि ड्युअल शक एब्जर्बर प्रयोग गरिएको छ । यसको ब्रेकिङ सेटअप सिंगल च्यानल एबीएस समावेश छ । त्यसको विपरीत, टीभीएस अपाचे आरटीआर २०० ४भीमा अगाडि यूएसडी फोर्क, पछाडि मोनोशक सस्पेन्सन, पेटल डिस्क ब्रेक र ड्युअल च्यानल एबीएस जस्ता आधुनिक फिचर समावेश छ ।

पल्सर २२०एफ मा १५ लिटर क्षमताको ठूलो इन्धन ट्याङ्की समावेश छ, जसले लामो दूरीको यात्रामा बारम्बार इन्धन भर्नुपर्ने झन्झट कम गर्छ । तर १६० किलोग्रामको कर्ब तौलका कारण शहरको ट्राफिकमा यसले अलि भारी महसुस गराउन सक्छ । टीभीएस अपाचे आरटीआर २०० ४भी भने १५१ किलोग्राम तौल भएकाले हलुका छ, १८० एमएम ग्राउन्ड क्लियरेन्सले खराब सडकमा पनि सहज बनाउँछ र ८०० एमएम सिट उचाइले शहरमा चलाउँदा कनट्रोल गर्ने सजिलो हुन्छ।

पल्सर २२०एफ मा ब्लुटुथ कनेक्टिभिटी, डिजिटल एलसीडी इन्स्ट्रयुमेन्ट कन्सोल र नेभिगेसन सपोर्ट जस्ता अपडेट गरिएको छ, जसले यसलाई पहिलेभन्दा आधुनिक बनाएको छ। तर अपाचे आरटीआर २०० ४भी मा ५ इन्चको टीएफटी डिस्प्ले, ट्र्याक्सन कन्ट्रोल, रेन, अर्बन र स्पोर्ट जस्ता राइड मोड, तथा ड्युबल च्यानल एबीएसले यसलाई सेग्मेन्टकै सबैभन्दा प्रविधियुक्त बाइकमध्ये एक बनाएको छ।

बजाज पल्सर २२०एफ को मूल्य नेपाली बजारमा ४ लाख १५ हजार रुपैयाँ रहेको छ, जबकि टीभीएस अपाचे आरटीआर २०० ४भी बीएस६ को मूल्य ४ लाख ३४ हजार रुपैयाँ निर्धारण गरिएको छ ।