तथ्यांक भन्छ : धेरै ईभी आयात हुने महिना बैशाख र जेठ

यो वर्षको बैशाख महिनामा नेपालमा १ हजार ४३४ विद्युतीय गाडी अर्थात ईभी भित्रिएका छन् । भन्सार विभागले केही दिन पहिले सार्वजनिक गरेको तथ्यांक अनुसार एक महिनाको अवधिमा यो परिमाणमा नेपालमा ईभी भित्रिएका हुन् । चालु आर्थिक वर्षको साउन देखि बैशाख मसान्त सम्म नेपालमा ८ हजार ६०५ ईभी भित्रिएको तथ्यांक छ ।

जेठ महिना समाप्ति पश्चात भन्सार विभागको आधिकारिक तथ्यांक आउने नै छ । तर पनि यो वर्षको जेठ महिनामा नेपालको उत्तरी नाकाबाट भित्रिएका गाडीको चर्चा अहिले निकै नै भइरहेको छ । सरकारी निकायले गाडी आयात वारेमा अनुसन्धान गर्नका लागि आवश्यक कार्य गरिरहेको समाचार समेत सार्वजनिक भइरहेका छन् ।

यो वर्षको पुसमा १ हजार २७३ र असोजमा २ हजार ६२० युनिट ईभी नेपाल भित्रिएका थिए । सामान्यतः जेठ र बैशाखका साथै चाडपर्वको समयमा समेत नेपालमा ईभीका साथै अन्य सवारी साधन धेरै भित्रिने गरेको पाइन्छ ।

यद्यपि नेपालमा ईभीको लहर चल्न थाले देखिको इतिहास हेर्ने हो भने प्रत्येक वर्षको बैशाख र जेठ महिनामै नेपालमा धेरै ईभी भित्रिएको पाइन्छ । ईभीमा पहिले सरकारको अस्थिर नीति रहेको र सामान्यतः बजेट पश्चात कर बढ्ने हल्लासँगै व्यवसायीहरुले धेरै ईभी भित्र्याउने गरेका थिए । त्यसैगरी पहिले देखि नै बुकिङ भएका गाडी बजेट अगाडि नै ल्याएर ग्राहकलाई उपलब्ध गराउने लक्ष्य अनुसार पनि धेरै ईभी भित्रिएको पाइन्छ ।

गत वर्ष अर्थात २०८२ जेठमा मात्र ३ हजार ६३३ ईभी भित्रिएका थिए भने बैशाखमा १ हजार ८९२ ईभी आयात भएका थिए । त्यसैगरी असारमा भने यो संख्या ७७ युनिटमा सीमित भएको थियो ।

गत आर्थिक वर्ष अर्थात २०८१ चैतमा ८७८ युनिट, फागुनमा ८३३ युनिट, माघमा ७७६ युनिट, पुसमा ७८३ युनिट, मंसिरमा २१० युनिट, कात्तिकमा ९६९ युनिट, असोजमा ९१६ युनिट, भदौमा २१ युनिट र साउनमा ३८१ युनिट ईभी नेपाल भित्रिएको तथ्यांक भन्सार विभागसँग छ ।

यो भन्दा अघिल्लो आर्थिक वर्षको समय अर्थात २०८१ जेठमा मात्र करिव ३ हजार हाराहारी अर्थात २ हजार ९६५ ईभी नेपाल भित्रिएका थिए । यस अनुसार उक्त आर्थिक वर्षमा नेपाल भित्रिएका ईभीमध्ये जेठ महिनामा मात्र २६ प्रतिशत ईभी भित्रिएका थिए । त्यसैगरी सोही वर्षको बैशाख महिनामा १ हजार ४०४ ईभी नेपाल भित्रिएका थिए । उक्त आर्थिक वर्षको चैत अर्थात २०८० चैतमा ६५८, फागुनमा २७६, माघमा १ हजार ५२, पुसमा १ हजार ४२१, मंसिरमा ८९९, कात्तिकमा ६५२, असोजमा १ हजार २३७ र साउनमा ११० युनिट ईभी नेपाल भित्रिएका थिए ।

यसरी आयात भएका ईभी मध्ये ७० प्रतिशत हाराहारी चीनबाट भित्रिएका थिए भने बाँकी भारत र अन्य देशबाट । अहिले पनि ट्रेन्ड यही नै छ ।

आर्थिक वर्ष २०८०।८१ मा रेकर्ड ब्रेक ईभी आयात भएको थियो । उक्त आर्थिक वर्षमा नेपालमा ११ हजार ७०१ ईभी भित्रिएका थिए । त्यसपछि असारमा एकैपटक यो संख्या २३५ मा झरेको थियो । यो वर्ष पहिले भन्दा अन्तःशुल्क र भन्सार दर बढेकाले एकैपटक पछि ईभी आयातको सख्या घट्न पुगेको थियो ।