अजरबैजान ग्रांपी आज, ९० डिग्री भएका १० मोडका कारण रेस बन्ने छ रोचक

विश्वकै सबैभन्दा खतरनाक रेसट्रयाक मध्ये एक मानिने अजरबैजानको बाकुस्थित रेस ट्रयाकमा आज अजरबैजान ग्रांपी हुँदैछ । मोटर स्पोर्ट्सको क्षेत्रमा लोकप्रिय मानिने यो रेस ट्रयाकमा ९० डिग्री भएका १० मोड छन् । यस्ता मोडमा रेसकारलाई ह्यान्डलिङ र ब्रेकिङ पकड कायम गर्न सक्ने ड्राइभर नै विजयी बन्ने छन् ।

सो रेसट्रयाकमा १.३ किलोमिटरको दुरी भने सिधा छ, जहाँ कारको स्पिड ३५० किलोमिटर सम्म हुन्छ । ट्रयाकमा गाडीको औसत स्पिड २०० किलोमिटर प्रतिघण्टा हुन्छ । यसमा ३०६ किलोमिटर लामो रेस हुन्छ ।

गत वर्ष कोरोना भाइरसको कारण रोकिएको ग्रान्ड प्रिक्स अर्थात ग्रांपी यो वर्ष हुन लागेको हो । यस पटक कारमा पिरेलीको ३सी, ४सी र ५सी टायर प्रयोग गरिदै छ । रेसस्थलमा निकै नै गर्मी हुने भएकाले यो टायरले गाडीको ह्यान्डलिङमा सहयोग गर्नेछ ।

सन् २०१७ मा पहिलो पटक आयोजना गरिएको अजरबैजान ग्रांपीमा दुई पटक नै मर्सिडिज कारले रेस जितेको छ । पहिलो च्याम्पियन डेनियल रिकार्डो थिए भने दोस्रो पटक लुइस ह्यामिल्टन विजयी भएका थिए ।