हवाई इन्धनको मूल्य दोब्बरले बढ्यो, डिजेल र पेट्रोलको मूल्य यथावत्

काठमाडौं - नेपाल आयल निगमले हवाई इन्धनको मूल्य करिब दोब्बरले बृद्धि गरेको छ ।

नेपाल आयल निगमले मंगलबार गरेको समायोजनमा आन्तरिक र अन्तर्राष्ट्रिय दुवै तर्फको उडानमा झन्डै दोब्बर बढ्नेगरी मूल्य समायोजन गरेको छ ।

निगमले सार्वजनिक गरेको प्रेस विज्ञप्तिअनुसार हवाई इन्धनको मूल्य आन्तरिकतर्फ साविक १२७ प्रतिलिटर रहेकामा समायोजन गरेर २५१ रुपैयाँ प्रतिलिटर कायम गरिएको छ।

यसकाे मूल्य अन्तर्राष्ट्रिय उडानतर्फ काठमाडौंमा यसअघि प्रति किलोलिटर ९६६ अमेरिकी डलर रहेकामा नयाँ समायोजनअनुसार एक हजार ७८५ डलर पुगेको छ ।

यश अनुसार पोखरामा यसअघि प्रतिकिलो लिटर ८०१ डलर रहेकामा बढाएर एक हजार ७३२ डलर पुग्दा भैरहवामा एक हजार ७१६ डलर पुर्‍याइएको छ ।

भैरहवामा यसअघि प्रतिकिलो लिटर ७८९ डलरमा कारोबार भइरहेको थियो ।

पेट्रोलमा ४१ र डिजेलमा ९४ रुपैयाँ बढेर आएपछि निगमले ती दुवै इन्धनको मूल्य भने समायोजन नगरी यसअघिकै मूल्यलाई यथावत राखेको छ ।