अटो शो, ईभी र अपेक्षा

सवारीसाधनको कुम्भ मेला मानिने “नाडा अटो शो–२०२४“ आजबाट सुरु भएको छ । नाडा अटोमोबाइल्स एसोसिएसन अफ नेपालले आयोजना गरेको यो मेला ६ दिनसम्म चल्नेछ । मेलामा बिभिन्न ब्रान्डका सवारीसाधन, तीनको मर्मतसम्भारमा प्रयोग हुने कम्पोनेन्ट, एक्सेसोरिज र बैंक तथा वित्तिय संस्थाहरु सहभागी भएका छन् ।

अटो शो मुलतः सबै प्रकारका अटोमोबाइल सामाग्रीको प्रदर्शन गरिने थालो भए पनि यहाँ विशेष चर्चा भने गाडी र मोटरसाइकलकै हुने गर्छ । यसमा पनि नयाँ ब्रान्डका गाडी र मोटरसाइकललाई अवलोकन गर्नकै लागि भनेर दर्शक मेलास्थलसम्म पुग्ने गर्छन् । अटो शोमा यसपटक २४ ब्रान्डका कार र १९ ब्रान्डका मोटरसाइकल सहभागी छन् । यीमध्ये अधिकांश ब्रान्डले कुनै न कुनै नयाँ मोडल लन्च गरेका छन् ।

अटो शोमा यसपटक विद्युतीय सवारी (ईभी) को बर्चस्व छ । प्यासेन्जर कारमा सुजुकी बाहेक अन्य सबै ब्रान्डले बिद्युतीय कार प्रदर्शन गरेका छन् भने मोटरसाइकल र स्कुटरमा पनि ईभीकै वर्चश्व छ । विश्व अटो बजारनै अहिले न्यू इनर्जी भेइकलमा सिफ्ट हुँदै गरेका कारण नेपालमा पनि यसको प्रभाब बढ्दै गएको हो ।

ईभी अहिले नेपाली अटो बजारका लागि मेन स्ट्रिम बनिसकेको छ । बजारमा यत्र–तत्र ईभीकै चर्चा चुलिँदो छ । हरेक दिन कुन न कुनै नयाँ ब्रान्डका ईभी भित्रिँदा उपभोक्ताले पनि आफ्नो रुचीको ब्रान्ड र मोडल छान्ने बिकल्प पाएका छन् । ईभीको संख्या बढ्दै गएपछि चार्जिङ पूर्बाधार समेत विस्तार हुँदै गएको छ । निजी प्रयोजनमा मात्र नभई सार्बजनिक यातायातमा प्रयोग हुने कमर्सियल भ्यान तथा माइक्रो वस समेत ईभीमय वनिरहेको छ ।

अटो बजार ईभी केन्द्रित भएका कारण यसलाई व्यवस्थित गर्दै दिगो बनाउन सरकार जिम्मेवार बन्नुपर्ने देखिन्छ । तर सरकारले यस विषयमा कुनै ठोस रणनीति अपनाउन सकेको छैन । ईभीका लागि आवश्यक इकोसिस्टम नै तयार पारेर अघि बढ्नु पर्नेमा सरकार यस विषयमा खासै गम्भिर देखिँदैन । सरकारको ध्यान अहिले गाडी आयात गर्न दिने र त्यसबापत राजश्व उठाउनमै बढी केन्द्रित रहेकोे गुनासो बढ्दो छ ।

बजारमा ईभीको माग बढ्न थालेपछि व्यवसायी पनि गाडी बिक्रीमै केन्द्रित छन् । केही ब्रान्डले त गाडी बिक्री गर्न थालिसके पनि अझै सर्भिस सेन्टर र चार्जिङ नेटवर्क विस्तार गर्न सकिरहेका छैनन् । यस्ता व्यवसायीले ईभीलाई सामान्य इलेक्ट्रोनिक ग्याजेटका रुपमा लिँदै आएका छन् । जसले भोलिका दिनमा ईभीप्रतिको भरोसा नटुटाउला भन्न सकिन्न । यी र यस्ता आम सरकोकारका विषयमा सचेत बन्दै नाडाले अटो शोमार्फत उचित वहस र पैरबी गर्नु आवश्यक छ । समयमै यसको दीर्घकालीन योजना र लक्ष्य निर्धारण गरेर कुशल ब्यबस्थापनमा केन्द्रित भैहाल्नुपर्ने अवस्था छ ।